Улаанбаатар хотод Монголын хүүхдийн спортын VIII наадам тавдугаар сарын 26-наас зургаадугаар сарын 6-ны өдрүүдэд болж байна. Наадмын шигшээ шатанд  21 аймаг, есөн дүүргийн нийт 6120 тамирчин 31 спортын төрлөөр өрсөлдөж байгаа бөгөөд маргааш наадмын хаалтын ёслол болно.

      Өнөөдрийн байдлаар наадамд оролцож буй 30 багаас  Хан-Уул дүүргийн баг 32 алт, 25 мөнгө, 25 хүрэл медальтайгаар тэргүүлж байгаа бол араас нь Сүхбаатар (53 медаль), Чингэлтэй (48 медаль) дүүргийн баг нэхэж байна.

      Аймгуудаас Орхон аймгийн баг 13 алт, 12 мөнгө, 15 хүрэл медальтай тэргүүлж байгаа бол дүүргүүдээс Хан-Уул дүүргийн баг 82 медальтай итгэл төгс тэргүүлж байна. Одоогоор 586 медаль эзэндээ очсон бөгөөд үлдсэн хугацаанд гурван спортын төрлийн дүнгээс хамааран Монголын хүүхдийн спортын зуны VIII наадмын дүн эцэслэгдэх юм.