Дэлхийн бөхийн холбооны чөлөөт, сонгомол бөхийн дэлхийн чансааны оноо олгох дөрвөн цуврал “Гран при”-гийн нэг болох  400 сая төгрөгийн шагналын сантай "Улаанбаатар опен-2025" тэмцээн тавдугаар сарын 29-нөөс, зургадугаар сарын 1-ний өдрүүдэд “Буянт-Ухаа” спортын ордонд болж өндөрлөв.  Энэ удаагийн “Гран при”-д дэлхийн 17 орны 350 гаруй тамирчин өрсөлдсөн юм. Монгол Улсаа төлөөлөн 120 тамирчин хүч үзэн өрсөлдөв.

      Чөлөөт бөхийн эмэгтэйчүүдийн жинд дөрвөн Монгол бүсгүй алтан медаль хүртсэн нь дэлхийн чансааны тэмцээнийг чимсэн гайхалтай сайхан амжилтууд байлаа. Тэмцээний сүүлийн өдөр эрэгтэйчүүдийн гурван жинд алтан медаль хүртэв. Эрэгтэйчүүдийн 57 кг-ын жинд ОУХМ Б.Мөнх-Эрдэнэ, 61 кг-д ОУХМ Т.Түвшинтулга, 125 кг-д МУГТ М.Лхагвагэрэл тус тус алтан медаль хүртсэн. Монголын сонгомол бөхийн багийнхан хоёр мөнгө, хоёр хүрэл, эмэгтэй чөлөөтийн багийнхан дөрвөн алт, зургаан мөнгө, зургаан хүрэл, эрэгтэй чөлөөтийнхөн гурван алт, хоёр мөнгө, дөрвөн хүрэл медалийг авч, эх орныхоо дэвжээнд сайхан наадлаа.

      Сонгомол бөхийн 87 кг-д Ц.Батбаяр мөнгө, 130 кг-д Б.Намбардагва мөнгө, 55 кг-д М.Даваабанди хүрэл, 97 кг-д Г.Ганхуяг хүрэл медаль авсан. Харин эмэгтэй чөлөөт бөхийн 53 кг-д Чинболдын Отгонтуяа хүрэл, 55 кг-д Б.Хулан алт, Баянмөнхийн Отгонтуяа хүрэл, 57 кг-д Хүрэлхүүгийн Болортуяа мөнгө, 59 кг-д Т.Алтжин мөнгө, Э.Гантуяа хүрэл, 62 кг-д П.Орхон алт, С.Цэрэнчимэд мөнгө, 65 кг-д Т.Энхжин алт, Н.Нархажид хүрэл, 68 кг-д Э.Дэлгэрмаа алт, Б.Ганцэцэг мөнгө, М.Батсүрэн хүрэл, 72 кг-д З.Болортунгалаг мөнгө, 76 кг-д Э.Даваанасан мөнгө, Г.Уртнасан хүрэл медаль тус тус хүртсэн.

     Эрэгтэй чөлөөт бөхийн 57 кг-д Б.Мөнх-Эрдэнэ алт, М.Даваабанди хүрэл, 61 кг-д Т.Түвшинтулга алт, 70 кг-д Т.Тулга хүрэл, 86 кг-д Б.Бямбадорж мөнгө, Н.Батбилгүүн хүрэл, 92 кг-д Б.Бат-Эрдэнэ хүрэл, 97 кг-д Г.Ганхуяг мөнгө, 125 кг-д М.Лхагвагэрэл алтан медаль хүртсэн сайхан амжилтыг үзүүллээ. Ийнхүү манай бөхчүүд долоон алт, арван мөнгө, 12 хүрэл медальтайгаар “Улаанбаатар опен-2025”-ыг өндөрлүүлж байна.

Б.ХУЛАН ЭМЭГТЭЙЧҮҮДИЙН 55 КГ-Д АЛТАН МЕДАЛЬ

       Чөлөөт, сонгомол бөхийн дэлхийн чансааны оноо олгох “Улаанбаатар опен-2025” тэмцээнд оролцож буй Монголын багийн эхний алтан медалийг ДАШТ-ий мөнгөн медальт, ОУХМ Б.Хулан авчирсан. Тэрбээр 55 кг-ын жинд учраа бүрээ илүүрхэн ялсаар нэг ч оноо алдалгүй итгэл төгс түрүүлсэн юм. Мөнгөн медалийг “U23” насны Азийн аваргын хүрэл медальт Энэтхэгийн Пушпа хүртсэн. Харин Монголын тамирчин, залуучуудын Ази тивийн хошой аварга, ОУХМ Баянмөнхийн Отгонтуяа хүрэл медаль авлаа.

П.ОРХОН ЭМЭГТЭЙЧҮҮДИЙН 62 КГ-Д АЛТАН МЕДАЛЬ

       Дэлхийн чансааны оноо олгох “Улаанбаатар опен-2025” тэмцээний эмэгтэйчүүдийн 62 кг-ын жинд дэлхийн аварга, МУГТ С.Цэрэнчимэд, дэлхийн аварга, МУГТ П.Орхон нар алтан медалийн төлөө барилдахаар шалгарч үлдсэн.  Тэд сүүлийн хоёр жилийн УАШТ-д дараалан финалдахад өнгөрсөн жил П.Орхон, энэ жил С.Цэрэнчимэд ялсан билээ. Харин энэ удаа дэлхийн чансааны тэмцээнд гавьяат тамирчин П.Орхон 11:2-оор С.Цэрэнчимэдийг илүүрхэн ялж, түрүүллээ.  Энэ жинд Дэлхийн бөхийн нэгдсэн холбооны нэр дээр барилдсан Оросын бөх, залуучуудын дэлхийн аварга Алина Касабиева хүрэл медаль хүртсэн.

Т.ЭНХЖИН ЭМЭГТЭЙЧҮҮДИЙН 65 КГ-Д АЛТАН МЕДАЛЬ

       Чөлөөт, сонгомол бөхийн дэлхийн чансааны оноо олгох “Улаанбаатар опен-2025” тэмцээний гурав дахь өдөр Монголын баг гурав дахь алтан медалиа хүртсэн.  Эмэгтэйчүүдийн 65 кг-ын жинд Азийн аваргын хошой мөнгөн медальт, сүүлийн хоёр жил дараалан улсын аварга болсон ОУХМ Т.Энхжин түрүүлэв. Тэрбээр дөрвөн барилдаанд дараалан ялахдаа нийт 23 оноо авч, хоёрхон оноо л алджээ. Энэ жинд “U23” хүртэлх насны Ази тивийн хошой аварга, “U23” насны ДАШТ-ий хүрэл медальт Энэтхэгийн Шишка үзүүрлэв. Харин хүрэл медалийг “U23” насны Азийн аваргын 5-р байрын шагналт Н.Нархажид хүртсэн юм.

Э.ДЭЛГЭРМАА ЭМЭГТЭЙЧҮҮДИЙН 68 КГ-Д АЛТАН МЕДАЛЬ

     Чөлөөт, сонгомол бөхийн дэлхийн чансааны оноо олгох “Улаанбаатар опен-2025” олон улсын “Гран при” тэмцээний эмэгтэйчүүдийн 68 кг-ын жинд ДАШТ-ий мөнгөн медальт, ОУХМ Э.Дэлгэрмаа ганц ч оноо алдалгүй босоо түрүүлсэн. Энэ жинд “U23” ангиллын Азийн аваргын хүрэл медальт Б.Ганцэцэг үзүүрлэсэн бол манай залуу бөх М.Батсүрэн хүрэл медаль гардан авсан юм. "Аварга" сургуулийн 12-ын “Б” ангийн сурагч, 18 настай М.Батсүрэнгийн хувьд олон улсын тэмцээний анхны медалиа авсан нь энэ байв. Ингэснээр 68 кг-ын жингийн бүх медалийг Монголын бөхчүүд хүртэв.