Мөсөн авиралтын ДАШТ-ий хүрэл медальт, дэлхийн цомын аварга, ОУХМ Нямдоогийн Сэлэнгэ 2005 оны энэ өдөр мэндэлжээ. Тэрбээр МУБИС-ийн Спорт, аялал жуулчлалын курсийн оюутан. “Сутайн Бор” клубийн тамирчин юм.

      Анх 2018 онд мөсөн спортын гараагаа эхлүүлсэн. Одоо долоо дахь жилдээ хичээллэж байгаа. Тэрбээр дэлхийн цомын аварга шалгаруулах тэмцээнд гурав дараалан түрүүлж гайхалтай амжилт үзүүлээд байгаа. ОУХМ Н.Сэлэнгэ Олон улсын уулын спортын холбоо (UIAA)-ны 2025 оны мөсөнд авиралтын дэлхийн цомын аварга шалгаруулах IV цуврал АНУ-ны Логнгмонт хотод болоход эмэгтэй хурдны төрөлд түрүүлж алтан медаль хүртэж, дэлхийн цомын аварга болсон.

     2025 онд Швейцарын Саас Фээд зохиогдсон ОУУХ(UIAA)-ны мөсөнд авиралтын дэлхийн цомын аварга шалгаруулах тэмцээнээс алтан медаль хүртэж дэлхийн цомын хошой аварга болж байлаа. 2025 онд Өмнөд Солонгост болсон дэлхийн цомын тэмцээнд түрүүлж, дэлхийн цомын гурван удаагийн аварга тамирчин болсон билээ.