Эх орныхоо дөрвөн зүгийн хязгаарт орших соёмбот баганыг төв цэгтэй холбосон 5000 км замыг туулахаар Алтай таван богдын Сонгинотын даваанаас гараагаа эхлүүлсэн “Таван цэг” багийн  тамирчин, БХЯ-ны зэвсэгт хүчний 123 дугаар ангийн хөгжимчин цэрэгжлийн спортын мастер, ахлах ахлагч Э.Даваажамц 52 хоногт 2595 км зам туулж, хэт холын марафон гүйлтийн дээд амжилтыг тогтоов. 

      Түүнтэй хамтран гүйгч БХЯ-нызЗэвсэгт хүчний 234-р ангийн гүүрчин аврагч, спортын мастер, дэд ахлагч Б. Буянхишигийн хувьд 2222 км замыг туулсан амжилтаар гүйлтээ зогсоосон билээ. Гэвч тэд төв суурин газруудад мөн л хамтдаа гүйж, цэргийн алба, хэт холын марафон спортыг орон нутгийн иргэд, хүүхэд залуучуудад сурталчилж байгаа юм. 

    Гүйгчид гараанаас гарснаас хойш Баян-Өлгий, Ховд, Говь-Алтай, Баянхонгор, Өвөрхангай, Булган, Төв, нийслэлийн Сонгинохайрхан, Налайх, Багануур дүүрэг, Хэнтий, Сүхбаатар, Дорнод гэсэн арван аймаг, гурван дүүргийн нутаг дэвсгэрийг дамжин гүйсэн байна. “Таван цэг” багийнхан баруун захын цэг Алтай таван Богдоос зүүн захын цэг Дорнод аймагт байрлах Соёлз уулын Модот хамар хүртэл 11 аймгийн 40 сумын нутаг дэвсгэрээр 3280 км замыг, хойд захын цэг Хөвсгөл аймагт байрлах Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэл таван аймгийн 23 сумын нутаг дэвсгэрээр 1720 км замыг тус тус туулж дуусгахаар төлөвлөсөн билээ. Ингэхдээ өдөрт дунджаар 50-55 км замыг туулж байна.