Иргэдийн эрүүл агаагаар амьсгал, спортоор хичээллэх, ая тухтай  амарч зугаалах газар нэгээр нэмэгдэх бололтой. Буддын шашны сүм хийдүүдийн холбооноос санаачлан Дархан-Уул аймгийн 31-р хорооллын арын толгойд “Төгс баясгалант” цэцэрлэгт хүрээлэнг байгуулахаар болсон байна. Тус цэцэрлэгт хүрээлэнг байгуулах зургаан га газрыг аймаг орон нутгаас шийдвэрлэж өгчээ. Цэцэрлэгт хүрээлэнд таван жилийн хугацаанд 10 мянган мод тарихаар төлөвлөсөн байна. Одоогоор 1000 гаруй гүйлс, бүйлс, шар хуйс моднуудыг тариад байгаа аж.

      Гацуур мод, буйлс, давхар дэлбээт буйлс, хүрэн монос, паркийн сарнай зэрэг ногоон ургамал бүхий тус төглийн дэргэд “Ногоон Дарь-Эх”-ийн хөшөөг байгуулж эргэн тойрных нь тохижилтыг байгаль, шашин, өв уламжлалыг орчин үеийн интерьертэй хослуулан хийх юм байна.

     Тус төглийг байгуулах төслийг сүсэгтэн олны хандив тусламж болон ААНБ, аймаг орон нутагтай хамтран хэрэгжүүлэх аж. “Тэр бум мод” үндэсний хөдөлгөөн, “Ногоон Дархан-2032” хөтөлбөрийн хүрээнд аймгийн хэмжээнд нийт 20 сая мод тарих зорилт тавьсан. Үүнд хувь нэмэр оруулах, дарханчуудын төдийгүй дотоод, гадаадын аялагчдын зорин очиж сэтгэлийн амар амгаланг мэдэрч, амралт чөлөөт цагаа өнгөрүүлэх тохь тухтай ногоон орчныг бий болгохоор зорьж байна.