Орхон аймгийн Эрдэнэт хотын спортоор хичээллэдэг хүүхэд, залуус спортын сэтгэл зүйн мэдлэгээ нэмэгдүүлж спортын амжилтаа ахиулах боломж бүрдэж байна. Эрдэнэт хотын "Мэдрэмж сэтгэл зүйн сургалт, зөвлөгөөний төв"-д Монголын спортын сэтгэл судлаачдын нэгдсэн холбооны гишүүн ОУХМ Б.Ойдовчимэд спортын сэтгэл зүйчээр ажиллаж эхэллээ.

       Сэтгэл зүйч Б. Ойдовчимэд нь 2021 онд МУИС-ийг Сэтгэл судлаач мэргэжлээр төгссөн. Тэрбээр 2015 онд жүдо бөхийн өсвөр үеийн анхны дэлхийн аваргын мөнгөн медалийг хүртэж байсан юм. Мөн “Жакарта-2018” Азийн наадмаас самбо бөхөөр мөнгөн медаль хүртэж, 2019 жүдо бөхийн ОУХМ, 2020 онд самбо бөхийн ОУХМ цол, тэмдэгээр шагнуулсан манай улсын шилдэг залуу тамирчдын төлөөлөл юм. Түүний гэр бүлийн хүн жүдо бөхийн ОУХМ Б.Цогт-Очир билээ.