Олон улсын жүдо бөхийн холбоо “IJF”-ийн цуврал “Астана-2025” их дуулга тэмцээн өчигдөр Казахстан Улсын Астана хотод эхэлсэн. Тус “Гранд слам” тавдугаар сарын 9-11-ний өдрүүдэд үргэлжилж өндөрлөнө.  Энэ удаагийн “Их дуулга” тэмцээнд одоогийн байдлаар 44 улсын эрэгтэй 202, эмэгтэй 156, нийт 358 тамирчин өрсөлдөж байна. Манай улсаас эрэгтэй 11, эмэгтэй 11, нийт 22 жүдочин зодоглож байгаа. Тэмцээний эхний хоёр өдрийн дараах байдлаар манай жүдочдоос 66 кг-ын жинд барилдсан Өнөрбатын Жанцандорж хүрэл медаль, 73 кг-ын жинд ОУХМ Лавжаргалын Анхзаяа, эмэгтэйчүүдийн 63 кг-ын жинд МУГТ Лхагватогоогийн Энхрийлэн нар хүрэл медаль, 48 кг-ын жинд ОУХМ Ганбаатарын Наранцэцэг шагналт тавдугаар байр, 63 кг-д ОУХМ Болдын Ганхайч долдугаар байр, 73 кг-д ОУХМ Батзаяагийн Эрдэнэбаяр шагналт долдугаар байрт шалгарсан амжилтыг үзүүлээд байна. Өнөөдөр”Гранд слам”-ын сүүлийн өдөр эрэгтэйчүүдийн 90, -100, +100 кг, эмэгтэйчүүдийн -78, +78 кг-ын жингийн барилдаан болно.

ЭРЭГТЭЙЧҮҮДИЙН 90 КГ Б.МӨНХБАЯР :

     Эрэгтэйчүүдийн 90 кг-ын жинд 31 жүдочин барилдах мэдүүлэг өгсөн байгаа. Манай улсаас Баттогтохын Мөнхбаяр хүч үзнэ. Тэрбээр “С” хэсгийн нэгдүгээр тойрогт Казахстаны Aidar ARAPOV-той таарсан байгаа. Хэрэв түүнийг ялах юм бол хоёрдугаар тойрогт Грекийн Theodoros TSELIDIS-тэй барилдана.

ЭРЭГТЭЙЧҮҮДИЙН -100 КГ Б.ХҮДЭРЧУЛУУН, А.ЭНХБАЯР :

     Эрэгтэйчүүдийн -100 кг-ын жинд 23 жүдочин барилдах мэдүүлэг өгсөн байна. Манай улсаас Баярцэнгэлийн Хүдэрчулуун, Алтаншагайн Энхбаяр нар барилдана. Б.Хүдэрчулуун “В” хэсгийн нэгдүгээр тойрогт Словенийн Gal BERTALANIC ZIZEK-тэй таарсан. Түүнийг ялах юм бол хоёрдугаар тойрогт Унгарын Zsombor VEG-тэй барилдана. Харин А.Энхбаяр “D” хэсгийн нэгдүгээр тойрогт Италийн Enrico BERGAMELLI-тэй таарсан. Хэрэв түүнийг ялах юм бол хоёрдугаар тойрогт Өмнөд Солонгосын KIM Seheon-той барилдана.

ЭРЭГТЭЙЧҮҮДИЙН +100 КГ Б.ГОНЧИГСҮРЭН :

     Эрэгтэйчүүдийн +100 кг-ын жинд ОУХМ Батхуягийн Гончигсүрэн жин өгсөн хүч сорин өрсөлдөнө. Тэрбээр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт ОХУ-ын Denis BATCHAEV-тэй барилдана.

ЭМЭГТЭЙЧҮҮДИЙН -78 КГ А.ДУЛАМСҮРЭН, Ж.УРАНГОО :

      Эмэгтэйчүүдийн -78 кг-ын жинд 17 жүдочин барилдах мэдүүлэг өгсөн байгаа. Манай улсаас залуу тамирчин Жадамбаагийн Урангоо, Айлтгүйбаатарын Дуламсүрэн нар хүч сорин өрсөлдөнө.  Ж.Урангоо “А” хэсгийн нэгдүгээр тойрогт Тайванийн Chieh-Hsi WANG-тэй таарсан байгаа. Түүнийг ялах юм бол  хоёрдугаар тойрогт Өмнөд Солонгосын KIM Minju-той барилдана. Харин А.Дуламсүрэн “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Бразилын Karol GIMENES-тэй барилдана.

ЭМЭГТЭЙЧҮҮДИЙН +78 КГ А.АДЪЯАСҮРЭН :

      Эмэгтэйчүүдийн +78 кг-ын жинд 14 жүдочин барилдах мэдүүлэг өгсөн байна. Манай улсаас ОУХМ Амарсайханы Адъяасүрэн барилдана. Тэрбээр “С” хэсгийн нэгдүгээр тойрогт ОХУ-ын Mariia IVANOVA-той таарсан. Түүнийг ялах юм бол “С” хэсгийн аваргын төлөөх барилдаанд Өмнөд Солонгосын LEE Hyeonji-той барилдана.