Энэ өдөр Монгол Улсад жүдо бөхийн спортыг үүсгэн байгуулагчдын нэг, Монгол Улсын шигшээ багийг үүсгэн байгуулалцаж явсан анхны ахлах дасгалжуулагч, гавьяат Чойсүрэнгийн Машбат агсан мэндэлж байжээ. Түүнийг Монголын жүдо бөхийн “Загалмайлсан эцэг” гэж хэлж болох байх. Тэрээр жүдо бөхийг эх орондоо хөгжүүлэх гэж зүтгэснийхээ төлөө ад үзэгдэн хэлмэгдлийн золиос болж явсан билээ. Ч.Машбат агсан тууштай тэмцсэний хүчинд жүдо бөхийн  эрэгтэйчүүдийн Улсын шигшээ багийг 1978 онд, эмэгтэйчүүдийн Улсын шигшээ багийг 1988 онд байгуулж чадсан байдаг. Түүний хичээл, зүтгэлийн төр засаг хожим үнэлж Монгол Улсын гавьяат дасгалжуулагч хэмээх алдрыг хүртээж байлаа.