Казахстан Улсын Астана хотод пара жүдо бөхийн насанд хүрэгчдийн дэлхийн аварга шалгаруулах тэмцээн энэ сарын 13-ны өдөр эхэлнэ. Манай улсаас паралимпын гурван дасгалжуулагч, нэг эмч, найман тамирчин оролцохоор бэлтгэл сургуулилалтаа хангаж байна.

     Монголын тамирчдын багийн ахлах дасгалжуулагчаар А.Мөнхбат, туслахаар С.Ядамдорж, зөвлөхөөр гавьяат тамирчин Г.Жамсран нар ажиллана. Багийн бүрэлдэхүүнд “J1” ангиллын эрэгтэйчүүдийн 70 кг-д спортын мастер Б.Бат-Эрдэнэ, Я.Очирваань, 81 кг-д Г.Чулуунсүх, -95 кг-д ОУХМ Д.Ганбат, +95 кг-д Л.Эрдэнэбилэг нар зодоглоно.

    Харин “J1” эмэгтэйчүүдийн 52 кг-д спортын мастер Т.Сувд-Эрдэнэ, 70 кг-д ОУХМ Л.Туруунаа барилдах юм. “J2” ангиллын эрэгтэйчүүдийн 81 кг-д спортын мастер Э.Даваадагва зодоглоно. Манай тамирчид Төв аймгийн Батсүмбэр сумын бэлтгэлийн баазад бэлтгэлээ хийж байна.

    Пара жүдо бөхийн ДАШТ нь дөрвөн жилд нэг удаа болдог бөгөөд Монголын тамирчдаас Л.Туруунаа ДАШТ-ээс мөнгөн медаль хүртсэн байдаг. Тэрбээр 2022 онд Азербайжаны Баку хотод болсон тэмцээнд финалдаж, мөнгөн медалиар энгэрээ мялааж байсан юм.

    Харин А.Мөнхбат дөрвөн жилд нэг удаа зохион байгуулдаг дэлхийн хараагүйчүүдийн наадмаас алт, мөнгөн медаль хүртэж байлаа. Түүний хувьд 2015 онд мөнгө авсан бол 2019 онд түрүүлж, төрийн дууллаа эгшиглүүлж байв.