Тайланд Улсын нийслэл Бангкок хотод жүдо бөхийн насанд хүрэгчдийн 2025 оны Ази тивийн аварга шалгаруулах тэмцээн энэ сарын 25-27-ны өдрүүдэд үргэлжилж байна. Энэ удаагийн Азийн аваргад 30 орны эрэгтэй 168, эмэгтэй 127, нийт 295 тамирчин өрсөлдөж байгаа. Монгол Улсаас Үндэсний шигшээ багийн ахлах дасгалжуулагч У.Эрдэнэбаатар, дасгалжуулагч П.Нямлхагва, Б.Хишигбаяр, Г.Болдбаатар нарын удирдлага дор 19 жүдоч өрсөлдөж байгаа юм.

     Азийн аварга шалгаруулах тэмцээний хувийн барилдааны сүүлийн өдөр эмэгтэйчүүдийн -78 кг-ын жинд А.Дуламсүрэн, +78 кг-ын жинд А.Адъяасүрэн, эрэгтэйчүүдийн 90 кг-ын жинд Б.Мөнхбаяр, -100 кг-ын жинд А.Энхбаяр, Б.Хүдэрчулуун, +100 кг-ын жинд Б.Гончигсүрэн нар барилдана.

     Эрэгтэйчүүдээс 90 кг-ын жинд Б.Мөнхбаяр түрүүлж барилдана. Тэрбээр АНЭУ-ын  тамирчин Ibragimov Sulemanov-той, -100 кг-ын жинд А.Энхбаяр Бахрейны Said Sadrudinov-той таарсан. -100 кг-ын жинд Б.Хүдэрчулуун нэгдүгээр тойрогт гоц мөргөн ялалт авсан. Хоёрдугаар тойрогт Иран Улсын Ali Reza Nikseresht-тэй барилдана. +100 кг-ын жинд Б.Гончигсүрэн Хятадын Li Ruihao-той  хүч үзнэ. Харин эмэгтэйчүүдийн -78 кг-ын жинд А.Дуламсүрэн Хойд Солонгос буюу БНАСАУ-ын Kim Ye Yong-той, +78 кг-ын жинд А.Адъяасүрэн, Макаогийн Lai Qing Lam-тай барилдана.