Таэквондогийн спортыг нэгдмэл байдлаар дэлхийн түвшинд гаргах зорилго бүхий “WT& ITF” хамтарсан зургаа дахь удаагийн “One taekwon-do championships 2025” олон улсын тэмцээнд боллоо. Тус тэмцээнд Өмнөд Солонгост ажиллаж амьдарч байгаа Ц.Галсантогтох Монгол Улсаа төлөөлөн амжилттай оролцож дараах амжилтыг үзүүллээ.

     Дэлхийн таэквондогийн холбооны тамирчид, Олон улсын таэквондогийн холбооны “WT”& ITF”  холимог тулааны эрэгтэй -80 кг ангилалд  Ц.Галсантогтох алтан медаль хүртжээ. Мөн тэрбээр “ITF”-ийн  эрэгтэй хар бүс -76 кг-ын хувийн тулааны төрөлд мөнгөн медаль тус тус хүртсэн байна.

    Тус тэмцээнд дэлхийн 22 орны 1680 тамирчин авьяас чадвараа сорин өрсөлджээ. Энэхүү тэмцээний онцлог тал нь таэквондогийн үндсэн хоёр төрөл болох “WT” болон  “ITF” холбооны таэквондогийн олон янзын техник, философийг нэг тайзан дээр харуулах боломжийг олгож, харилцан суралцах, нэгдмэл байдлаар хөгжих боломжийг эрэлхийлж байгаагаараа сонирхолтой байжээ.