Монгол Улсын гавьяат тамирчин, самбо бөхийн дэлхийн аварга Очирын Одгэрэл 1972 оны энэ өдөр Увс аймгийн Хяргас суманд мэндэлжээ. Тэрбээр үндэсний улсын заан цолтой. Үндэсний бөхөөр улсын баяр наадамд 1996 онд зургаа давж улсын начин цол хүртсэн. 2001 оны улсын баяр наадамд долоо давж Монгол Улсын заан цолтон болсон юм. Самбо бөхөөр өсвөр үе, залуучууд, насанд хүрэгчдийн дэлхийн аварга шалгаруулах тэмцээнээс алт, мөнгө, хүрэл медаль хүртэж байв. Самбо бөхийн насанд хүрэгчдийн дэлхийн аварга шалгаруулах тэмцээнд 1995 онд түрүүлж, дэлхийн аварга болсон. Харин жүдо бөхөөр “Бангкок-1998” Азийн наадмаас хүрэл медаль, “Манила-1997”, “Улаанбаатар-2001” Азийн аварга шалгаруулах тэмцээнээс хүрэл медаль хүртэж байлаа.