Дархан-Уул аймгийн Иргэдийн төлөөлөгчдийн хурлын ес дэх удаагийн сонгуулийн ээлжит зургадугаар хуралдаанаар өнөөдөр дөрөвдүгээр сарын 11-ний өдөр орон нутгийн тусгай хамгаалалтад авсан газрын хэмжээнд өөрчлөлт оруулах асуудлыг хэлэлцэн баталлаа.

    Тодруулбал “Миний Монгол цэцэрлэгт хүрээлэн”-ийн тусгай хамгаалалтад авсан нийт 36.1 га газрын 0.482 га газарт нь өвлийн мөсөн ордон, соёл амралтын цогцолбор байгуулахаар төлөвлөсөн байна. Тус ордон нь олон улсын хоккейн холбооны шаардлагыг хангахуйц жилийн дөрвөн улиралд ашиглах боломжтой 450 хүний суудалтай, 7500 м/кв талбай бүхий цогцолбор байх аж. Мөн авто машины зогсоолыг бүрэн шийдвэрлэх гэнэ.

    Улсын төсвийн хөрөнгө оруулалтаар хэрэгжих тус ажлын захиалагч нь Соёл, спорт, аялал жуулчлал, залуучуудын яам бөгөөд ерөнхий гүйцэтгэгчээр хилийн цэргийн 0119-р ангийн бие бүрэлдэхүүн ажиллах юм. Харин Батлан хамгаалах яамны харьяа Барилга захиалагчийн газар хяналт хэрэгжүүлэгчээр ажиллана.