Монголын пара бочигийн улсын аварга шалгаруулах тэмцээн  Спортын төв ордонд боллоо. Найм дахь удаагийн тэмцээнд 14 багийн нийт 78 тамирчин дөрвөн ангилал “BC1”, “ВС2”, “ВС3”, ВС4”-өөр өрсөлдөж байгаа бөгөөд хамгийн залуу нь 10 настай Б.Азжаргал бол хамгийн ахмад нь 57 настай Б.Болдмаа байв.

     Тус тэмцээний нээлтийн ёслолд БТСУХ-ны дарга Э.Билэгт оролцож, хэлсэн үгэндээ “Үндэсний шигшээ багийн бүрэлдэхүүнд пара бочигийн дасгалжуулагч, тамирчид маань багтаж, зуны паралимпын наадамд оролцох эрх авахын төлөө хичээл зүтгэл гарган ажиллаж байна. Энэхүү тэмцээнийг зохион байгуулсанаар хүүхэд, залууст спортоор хичээллэх эрмэлзлийг төрүүлж, тамирчдын өрсөлдөх чадвар ахина” хэмээн онцлов.

     Пара бочигийн спорт нь манай улсад 2017 оноос хөгжсөн ба Монголын баг тамирчид зуны паралимпын наадмаас бусад тэмцээн уралдаанд оролцжээ. Монголын пара бочигийн тамирчид олон улсын тэмцээнээс гурван медальтай бөгөөд Дэлхийн цомоос Т.Мөнхдэмбэрэл мөнгө, Х.Ирмүүн хүрэл, “Парис-2024” зуны паралимпын эрх олгох олон улсын тэмцээнээс Х.Ирмүүн хүрэл медаль хүртэж байв. Пара бочигийн УАШТ найман удаа болоход хамгийн өндөр амжилтыг Х.Ирмүүн үзүүлсэн ба тэрбээр зургаан удаа түрүүлжээ.