Хөл бөмбөгийн эмэгтэйчүүдийн 2026 оны Ази тивийн аварга шалгаруулах тэмцээний урьдчилсан шатны сугалаа энэ долоо хоногт боллоо. Азийн аваргад өрсөлдөх 34 орноос Монголын эмэгтэй шигшээ баг Тайланд, Энэтхэг, Зүүн Тимор, Иракийн багуудтай “В” хэсэгт багтлаа.

      Урьдчилсан шатны “А”, “В” хэсэгт тус бүр таван баг багтсан байна. “А” хэсэгт Иран, Йордан, Сингапур, Путан, Ливан Улс орсон байгаа. Харин “С”, “D”, “E” зэрэг зургаан хэсэгт тус бүр дөрвөн баг багтсан байна. 2026 оны Ази тивийн аварга шалгаруулах тэмцээний урьдчилсан шатанд өрсөлдөх багуудын тоглолт ирэх зургаадугаар сарын 23-наас эхэлнэ.

      Монголын эмэгтэй баг дөрвөн жилийн өмнө анх удаа Азийн цомын тэмцээнд оролцох урьдчилсан шатанд өрсөлдөж байв. Түүнээс хойш олимпын наадам, Зүүн Ази болон ДАШТ-ий урьдчилсан шатанд тоглож байсан юм. Өнгөрсөн оны дөрөвдүгээр сарын байдлаар Олон улсын хөл бөмбөгийн холбооноос гаргасан чансааны жагсаалтад 193 орноос 128 дугаарт бичигджээ.