Олон улсын олимпын академи болон Пелопоннесийн их сургуулийн хамтран зохион байгуулдаг “Олимп судлал, олимпын боловсрол, олимпын арга хэмжээний зохион байгуулалт ба менежмент” магистрын тэтгэлэгт хөтөлбөрийг Үндэсний олимпын хороод (NOCs) болон Олимпын академийн төлөөлөгчдөд нээлттэй зарлаж байна.

      Хөтөлбөрийн элсэлт 2025 оны есдүгээр сард эхлэх бөгөөд өргөдөл гаргах эцсийн хугацаа 2025 оны дөрөвдүгээр сарын 30-ны өдөр юм. Олимпын эв санааны нэгдлээс сургалтын төлбөрт тэтгэлэг олгох бөгөөд онцгой тохиолдолд замын зардал, хоол, орон байрны зардлыг хамруулах боломжтой.

     Пелопоннесийн их сургуулиудад болон олимпын академид зэрэг өргөдлөө өгсөн байх шаардлагатай ба зөвхөн их сургуулийн сонгон шалгаруулах хорооны зөвшөөрсөн нэр дэвшигчид л тэтгэлэгт хамрагдах боломжтой аж. Хамгийн хэрэгцээтэй гэж үзсэн, өнгөрсөн хугацаанд тухайн хөтөлбөрт тэтгэлэг аваагүй Үндэсний олимпын хороонд давуу эрх олгох гэнэ. Түүнчлэн хүйсийн тэнцвэрийг хангаж нэр дэвшигчид сонгогдох юм.