Монгол Улсын Батлан хамгаалах яамнаас “Оюутан цэрэг хөтөлбөр”-ийг арав дахь жилдээ хэрэгжүүлж байна. Энэ жил “Оюутан цэрэг” цэргийн мэргэжил олгох сургалтын журам шинэчлэгдэж 1-3 дугаар дамжааны оюутан суралцагч хамрагдах боломжтой болсон.

    Тус хөтөлбөрт Дархан-Уул аймгийн хэмжээнд 150 оюутан бүртгэгдсэнээс эрүүл мэндийн үзлэг, бие бялдрын өв тэгш байдал, биеийн тамирын шалгалтыг өгч шалгуур үзүүлэлт хангасан 63 оюутан батламжаа гардаж авлаа.

    Сургалтыг цэргийн ерөнхий бэлтгэл, цэргийн мэргэжлийн бэлтгэл гэсэн хоёр үе шаттайгаар зохион байгуулна. Цэргийн ерөнхий бэлтгэл шатны сургалт нь хоёр багц, 96 цагийн хичээл орох ба дөрөвдүгээр сарын 5-ны өдрөөс долоо хоног бүрийн бямба, ням гарагт, зургаан цагаар хоёр сарын туршид явуулах юм. Харин цэргийн мэргэжлийн бэлтгэлийг зургадугаар сарын 15-наас эхлэн хоёр сарын хугацаанд явуулна.