Нийслэлийн ерөнхий боловсролын “Аварга” спортын сургуулийн дунд, ахлах ангийн сурагчид спорт, олимпизмын боловсролоо нэмэгдүүлэх, сурсан зүйлсээ бататгах зорилгоор өнөөдөр “Олимпик хаус”-т зочилж, “Олимпын музей”-г үзэж сонирхлоо.

     Ерөнхий боловсролын сургуулийн бие даалтын долоо хоногийн хүрээнд “АВАРГА” сургууль сурагчдадаа спортод дур сонирхолтой болгох, спортод шинжлэх ухаанчаар хандах, олимпын хөдөлгөөн, олимпизмын талаарх мэдлэгээ ахиулахад нь зориулж энэхүү ажлыг зохион байгуулж байгаа юм байна.

     ОУОХ-ны хүндэт гишүүн, Монгол Улсын Соёлын гавьяат зүтгэлтэн Ш.Магваны нэрэмжит “Олимпын музей” нь олимпын боловсрол, үнэт зүйлсийг сурталчлан таниулах, олимпизмын үзэл санааг түгээн дэлгэрүүлэх, олимп, тив, бүсийн наадамд эх орныхоо нэрийг мандуулсан шилдэг тамирчдаа алдаршуулах зорилготой бөгөөд өдөр бүр нээлттэй, үнэ төлбөргүйгээр үйл ажиллагаагаа явуулж байна.