Чөлөөт бөхийн Ази тивийн аварга шалгаруулах тэмцээнээс Монголын бөхчүүд таван медалиа хүртлээ. Өчигдөр манай эмэгтэй бөхчүүд гурван хүрэл медаль авсан бол өнөөдөр нэг мөнгө, нэг хүрэл медаль нэмж авлаа. ОУХМ Т.Энхжин 65 кг-д үзүүрлэн мөнгөн медалийн болзол хангасан. Харин 72 кг-ын жинд хүч сорьсон З.Болортунгалаг хүрэл медалийн төлөөх барилдаанд залуучуудын олимпын мөнгө, хүрэл медальт, өсвөр, залуучуудын Азийн аваргын мөнгө, хүрэл медальт, ДАШТ-ий тавдугаар байрын шагналт Узбекистаны Светлана Окназароваг даралтаар цэвэр яллаа. Ингэснээр З.Болортунгалаг тивийн аваргаас тав дахь хүрэл медалиа хүртэж байна. Тэрбээр мөн 2021 оны Азийн аваргад түрүүлсэн билээ.