Чөлөөт бөхийн 2025 оны Ази тивийн аварга шалгаруулах тэмцээний гурав дахь өдөр, өнөөдөр манай таван бөх зодоглов. Эмэгтэйчүүдийн 59 кг-ын жинд Т.Алтжин, 68 кг-д ОУХМ Э.Дэлгэрмаа нар шөвгийн наймын учраагаа ялснаар их шөвөгт шалгараад байна.

      Улсын шинэхэн аварга Т.Алтжингийн хувьд Киргизстаны бөх, “U-20” насны Азийн аваргын мөнгөн медальт Танчолпон Кибалбековаг 8:0-ээр буулгаж авсан. Одоо тэрбээр хагас шигшээд Японы Сакүра Онишитэй барилдах юм.

      ДАШТ-ий мөнгө, Азийн наадмын хүрэл медальт, ОУХМ Э.Дэлгэрмаа 68 кг-ын шөвгийн наймд Өмнөд Солонгосын Ким Мин Жу-г цэвэр ялж, мөн хагас шигшээд үлдээд байна. Барилдаанд манай бөх 9:0-ээр тэргүүлж яваад цэвэр дарлаа. Одоо манай бөх Хойд Солонгос буюу БНАСАУ-ын бөх, Парисын олимпын тавдугаар байрын шагналт Пак Сол Гум-тай барилдана.