Йордан Улсын Амман хотод чөлөөт бөхийн насанд хүрэгчдийн Ази тивийн аварга шалгаруулах тэмцээн өнөөдөр эхэллээ. Тэмцээнд манай улсаас чөлөөт бөхийн төрөлд Үндэсний шигшээ багийн эрэгтэйчүүдийн багийн ахлах дасгалжуулагч Д.Гомбодорж ажиллаж байгаа.

   Туслах дасгалжуулагчаар Ж.Чулуунбат, Г.Амархүү, харин эмэгтэйчүүдийн багийн ахлах дасгалжуулагч С.Сүхбаатар, туслах дасгалжуулагчаар Б.Одончимэг, Ө.Ууганбаяр нарын удирдлага дор нийт 20 тамирчин оролцож байна.

    Эхний өдөр эмэгтэйчүүдийн 50 кг-ын жинд Б.Мөнхнар, 55 кг-д Б.Отгонтуяа, 59 кг-д Т.Алтжин, 68 кг-д Э.Дэлгэрмаа, 76 кг-д Э.Даваанасан нар хүч үзэж байна. Дөнгөж сая 50 кг-ын жинд Б.Мөнхнар эхний тойрогт Хятадын бөхөд ялагдсан бол 55 кг-ын жинд ОУХМ Баянмөнхийн Отгонтуяа Өмнөд Солонгосын бөхийг 10:0-ээр оноогоор  цэвэр ялсан. Шөвгийн наймын барилдаанд Казахстаны Зульфия Яхароваг 11:00-ээр оноогоор цэвэр яллаа. Б.Отгонтуяа хоёр барилдаан хийхдээ өрсөлдөгч бөхчүүддээ нэг ч оноо алдалгүйгээр цэвэр ялаад байна.