Батлан хамгаалах салбарт 2025 оныг “Эх оронч Монгол-Их сэргэлтийн жил” болгон зарлажээ. Энэ хүрээнд "Эх оронч дарханчууд" нэг сарын нөлөөллийн аяныг Дархан-Уул аймгийн Гэмт хэргээс урьдчилан сэргийлэх ажлын зохицуулах салбар зөвлөл, АЗДТГ-ын Цэргийн штабаас зарласан байна. Аяны хүрээнд ерөнхий боловсролын сургуулийн ахлах ангийн сурагчдад “Цэргийн нэг өдөр” арга хэмжээг өнөөдөр гуравдугаар сарын 26-ны өдөр зохион байгуулжээ.

       Сурагчид зэвсэгт хүчний 330-р ангийн хээрийн байрлалд очин цэргийн хээрийн буудлага, техник хэрэгсэлтэй танилцан, буухиа тэмцээнд оролцож, цэргийн хээрийн хоол идэж нэг өдрийг сонирхолтой өнгөрүүлж байна.

       Батлан хамгаалах тогтолцоонд сэргэлт хийж, эх оронч үзэлд суурилсан хүн төвтэй бодлого хэрэгжүүлж, үндэсний сөрөн тэсвэрлэх чадавхыг бэхжүүлэх зорилгын дор энэхүү үйл ажиллагааг Дархан-Уул аймгийн ЗДТГ-ын Цэргийн штабаас зохион байгуулж байгааг Цэргийн штабын дарга, хошууч Б.Оргилсайхан хэллээ.