Хөл бөмбөгийн дэлхийн аварга шалгаруулах тэмцээний Азийн бүсийн урьдчилсан тэмцээн боллоо. Иран Улсын шигшээ баг өөрийн талбайдаа Узбекистаны багийг хүлээн авч тоглов. Тус тоглолтод Ираны баг Узбекистантай тэнцсэнээр ДАШТ-д оролцох эрхээ авлаа.

     ДАШТ-нд оролцогчдыг сонгон шалгаруулах тэмцээний наймдугаар тойргийн тоглолтод хоёр баг 2:2-ын харьцаагаар тэнцсан  Ираны багийн хоёр гоолыг Мехди Тареми (52 болон 83 дахь минут/ оруулжээ. Узбекистаны багаас Хожимат Эркинов 16 дахь, Москвагийн ЦСКА-д тоглодог Аббосбек Файзуллаев 53 дахь минутад гоолдсон байна.

     Ираны баг 20 оноотой болсноор “А” хэсгээс нэгээр эсвэл хоёроор гарах нь тодорхой болж, сонгон шалгаруулах тэмцээн дуусахаас хоёр тойргийн өмнө ДАШТ-д оролцох эрхээ авлаа. Ингэснээр иранчууд дөрвөн ДАШТ-д дараалан оролцохоор болж байна. Мөн түүхэндээ долоо дахь удаагаа оролцох юм.

     Харин 17 оноотой болсон Узбекистаны баг дараагийн тойрогт АНЭУ-ын багтай, Иран улс Катарын багтай талбайд нь тоглоно. Тоглолт зургаадугаар сарын 5-ны өдөр болно. АНЭУ-ын баг долоон тоглолтын дараах байдлаар 10 оноотой болж, хэсэгтээ гуравдугаарт бичигдэж байна. Энэ хэсгээс гурав ба дөрвөөр шалгарсан багууд ДАШТ-ний эрх авахын тулд бусад тивийн багуудтай нэмэлт тоглолт хийнэ.