Гүрж Улсын нийслэл Тбилис хотод Олон улсын жүдо бөхийн холбоо “IJF”-ийн цуврал “Тбилис-2025 Гранд слам” тэмцээний гурав дахь өдрийн барилдаан эхэлж байна. Энэ удаагийн их дуулга тэмцээнд манай улсаас 48 кг-ын жинд Г.Наранцэцэг, Ж.Анударь, 52 кг-ын жинд М.Нандин-Эрдэнэ, Ц.Гал-Од, 57 кг-ын жинд М.Ичинхорлоо, Т.Ариунзаяа, 70 кг-ын жинд Д.Есүй, -78 кг-ын жинд А.Дуламсүрэн, +78 кг-ын жинд А.Адъяасүрэн нар барилдана. Эрэгтэйчүүдийн 60 кг-ын жинд Э.Ариунболд, К.Ёолк, 66 кг-ын жинд  Ө.Бямбасүрэн, 73 кг-ын жинд  О.Уранбаяр, 81 кг-ын жинд О.Шинэбаяр, 90 кг-ын жинд Ц.Ган-Эрдэнэ, Б.Мөнхбаяр, -100 кг-ын жинд Б.Хүдэрчулуун, +100 кг-ын жинд Б.Гончигсүрэн нар өрсөлдөж байна. Өчигдөр 63, 70, 73, 81 кг-ын жингийн барилдаан боллоо. Өнөөдөр эмэгтэйчүүдийн -78, +78, эрэгтэйчүүдийн 90, -100, +100 кг-ын жингийн барилдаан явагдаж “Тбилис-2025” их дуулга өндөрлөнө.

ЭМЭГТЭЙЧҮҮДИЙН -78  КГ-ЫН ЖИНД А.ДУЛАМСҮРЭН ХҮЧ ҮЗНЭ

     Эмэгтэйчүүдийн -78 кг-ын жинд 18 тамирчин барилдах мэдүүлэг өгсөн байгаа. Манай улсаа Айлтгүйбаатарын Дуламсүрэн барилдана. Тэрбээр “С” хэсгийн нэгдүгээр тойрогт ОХУ-ын 18 настай залуу тамирчин Kristina KONOVALOVA-тай таарсан. Хэрэв түүнийг ялж чадах юм бол хоёрдугаар тойрогт Литавын  Migle Julija DUDENAITE-тай барилдана.

ЭМЭГТЭЙЧҮҮДИЙН +78  КГ-ЫН ЖИНД А.АДЪЯАСҮРЭН ӨРСӨЛДӨНӨ

    Эмэгтэйчүүдийн +78 кг-ын жинд 18 тамирчин барилдах мэдүүлгийг өгөөд байна. Манай улсаас тус жинд ОУХМ Амарсайханы Адъяасүрэн барилдана. Тэрбээр “D” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт амаргүй өрсөлдөгч, хашир туршлагтай тамирчин Сербийн Milica ZABIC-тай таарсан. Хэрэв түүнийг ялж чадах юм бол “D” хэсгийн аваргын төлөөх барилдаанд Францын  Julia TOLOFUA-тай таарах магадлалтай байна.

ЭРЭГТЭЙЧҮҮДИЙН 90 КГ-ЫН ЖИНД Ц.ГАН-ЭРДЭНЭ, Б.МӨНХБАЯР ХҮЧ ҮЗНЭ

     Эрэгтэйчүүдийн 90 кг-ын жинд 29 бөх барилдах мэдүүлэг өгсөн байна. Манай улсаас Цэрэнбатын Ган-Эрдэнэ, Баттогтохын Мөнхбаяр нар барилдана. Ц.Ган-Эрдэнэ “А” хэсгийн нэгдүгээр тойрогт Нидерландын Mark VAN DIJK-тай таарсан байгаа. Хэрэв түүнийг ялж чадах юм бол хоёрдугаар тойрогт Гүржийн Luka MAISURADZE-тэй барилдана. Б.Мөнхбаяр “D” хэсгийн нэгдүгээр тойрогт Словак Улсын Alex BARTO-той таараад байна. Түүнийг буулган авч чадвал хоёрдугаар тойрогт Бразилын Rafael  MACEDO-той хүч үзнэ.

ЭРЭГТЭЙЧҮҮДИЙН -100 КГ-ЫН ЖИНД Б.ХҮДЭРЧУЛУУН ХҮЧ СОРИНО

    Эрэгтэйчүүдийн -100 кг-ын жинд 33 барилдах мэдүүлэг өгөөд байна. Манай улсаас тус жинд Баярцэнгэлийн Хүдэрчулуун барилдах юм. Тэрбээр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт дэлхийн аварга Кубын Ivan Felipe SILVA MORALES-тай таарсан. Хэрэв түүнийг ялж чадах юм бол гуравдугаар тойрогт Азербайжан, Гүржийн бөхчүүдийн хэн ялсантай барилдана.

ЭРЭГТЭЙЧҮҮДИЙН +100 КГ-ЫН ЖИНД БАТХУЯГИЙН ГОНЧИГСҮРЭН ӨРСӨЛДӨНӨ

    Эрэгтэйчүүдийн +100 жинд 18 тамирчин барилдах мэдүүлгийг одоогоор өгөөд байна. Манай улсаас ОУХМ Батхуягийн Гончигсүрэн анх удаа гранд слам ангиллын тэмцээнд жин өгсөн +100 кг-ын жинд барилдаж эхлэх гэж байгаа. Тэрбээр “В” хэсгийн нэгдүгээр тойрогт гоц мөргөн ялалт авсан. Хоёрдугаар тойрогт Гүржийн Saba INANEISHVILI-тай барилдана. Түүнийг ялах юм бол “В” хэсгийн аваргын төлөө Узбекистан, Германы бөхчүүдийн хэн ялсантай өрсөлдөх юм.

    Өчигдөр тэмцээний хоёр дахь өдөр эмэгтэйчүүдийн 70 кг-ын жинд манай улсаас Дарханбатбаярын Есүй барилдсан. Тэрбээр “С” хэсгийн нэгдүгээр тойрогт ОХУ-ын Eva OGNIVOVA-г ялсан. Хоёрдугаар тойрогт Шведийн  Ida ERIKSSON-д хожигдсон.

   Эрэгтэйчүүдийн 73 кг-ын жинд манай улсаас ДАШТ-ий хүрэл медальт, ОУХМ Лавжаргалын Анхзаяа, ОУХМ Одгэрэлийн Уранбаяр нар барилдсан. ОУХМ Л.Анхзаяа “А” хэсгийн нэгдүгээр тойрогт Туркийн Ejder TOKTAY-тай хожигдсон. ОУХМ О.Уранбаяр “С” хэсгийн нэгдүгээр тойрогт гоц мөргөн ялалт авсан байгаа. Хоёрдугаар тойрогт Киргизстаны Nurmukhammed BAKIRDINOV-ыг б ялсан. Гуравдугаар тойрогт Австрийн Samuel GASSNER-д ялагдлаа.

   Эрэгтэйчүүдийн 81 кг-ын жинд манай улсаас Оюунчимэгийн Шинэбаяр барилдсан. Тэрбээр “D” хэсгийн нэгдүгээр тойрогт Грекийн Michail TSOUTLASVILI-ийг ялсан. Хоёрдугаар тойрогт Австрийн Bernd FASCHING-ийг буулган авсан Гуравдугаар тойрогт Израилийн Iftach BADASH-ийг ялсан. Улмаар шигшээ наймд үлдэж “D” хэсгийн аваргын төлөөх барилдаанд Гүржийн Irakli BEROSHVILI хожигдсон. Дагах тойргийн барилдаанд Францын Arnaud AREGBA-д ялагдаж, шагналт долдугаар байраар тэмцээнээ өндөрлүүлсэн.