Чөлөөт бөхийн “Осло 2021” ДАШТ-ий хүрэл медальт, Иван Ярыгины “Алтан гран при”-гийн аварга, “Хилчин” спорт хорооны бөх, Монгол Улсын гавьяат тамирчин Эрхэмбаярын Даваачимэг энэ өдөр мэндэлжээ.  Тэрбээр Завхан аймгийн Цэцэн-Уул суманд 1995 оны гуравдугаар сарын 22-ны өдөр төрсөн. Дунд сургуулийн нэгдүгээр ангиа төгсөх жилээ Эрдэнэт хот руу шилжсэн. 2007 оноос хойш чөлөөт бөхөөр хичээллээд өдий хүртэл явж байгаа.

      Чөлөөт бөхөөр сонирхож хичээллэх болсон шалтгаан гэвэл аавынх нь том ахын хоёр хүү сумын наадамд зодоглодог байж. Тэр хоёрыг дэмжиж барилдааныг нь очиж үздэг байсан гэдэг. Тэр үеэс л бөхийн спортод дур сонирхолтой болсон юм билээ. Анх Паламын Чулуунбаатар багшийн шавь болж  бөх болох мөрөөдөлдөө хүрч байжээ. 2007 оноос эхлээд өнөөг  хүртэл чөлөөт бөхөөр хичээллэж байгаа.

      Э.Даваачимэг залуучуудын ДАШТ-ээс алт, хүрэл, оюутны ДАШТ-ий мөнгө, дэлхийн цомын хүрэл, насанд хүрэгчдийн Азийн аварга шалгаруулах тэмцээний мөнгө, хошой хүрэл медальтай. ”Осло-2021” насанд хүрэгчдийн ДАШТ-ээс хүрэл медаль хүртсэн. Тэрбээр тулгар төрийн 2233 жил, Их Монгол Улсын 818 жил, Үндэсний эрх чөлөө, тусгаар тогтнолоо сэргээн мандуулсны 113, ардын хувьсгалын 103 жилийн ойгоор  Монгол Улсын гавьяат тамирчин цол хүртсэн.