Олимпын хөдөлгөөний дээд байгууллага ОУОХ-г ирэх найман жилд удирдах ерөнхийлөгчийг сонгох түүхэн чуулган болох гэж байна. ОУОХ-ны 144 дэх удаагийн хуралд оролцохоор ОУОХ-ны гишүүн, МҮОХ-ны ерөнхийлөгч Б. Баттүшиг Грек Улсад хүрэлцэн очоод байна.

    ОУОХ-ны ерөнхийлөгч Томас Бах нь 2013 оноос эхлэн 12 жил тасралтгүй энэхүү байгууллагыг амжилттай удирдан чиглүүлсэн бөгөөд дэлхий дахинаа тохиосон ковидын цар тахлын хүндхэн үед ч “Токио 2020”, “Бээжин 2022” олимпын наадмуудыг амжилттай зохион байгуулснаас гадна “Olympic Agenda 2020”, “Olympic Agenda 2020+5” зэрэг стратеги төлөвлөгөөг хэрэгжүүлсний дүнд спонсор байгууллагын дэмжлэг 60 хувиар нэмэгдээд байна.

      ОУОХ-ны ерөнхийлөгчид долоон нэр дэвшигч өрсөлдөж байгаа бөгөөд гурав дугаар сарын 20-ны өдөр болох сонгуулиар 2025 оны олимпын циклд ОУОХ-г удирдах шинэ ерөнхийлөгч сонгогдох билээ. Өчигдөр болж өнгөрсөн ОУОХ-ны Гүйцэтгэх зөвлөлийн хурлын шийдвэрээр боксын спортын төрлийг “Лос Анжелес 2028” Олимпын наадмын хөтөлбөрт багтаах болсноо Томас Бах хэвлэлийн бага хурлын үеэр мэдэгдэж, энэхүү шийдвэрийг маргааш эхлэх чуулганы үеэр гишүүд баталгаажуулна гэдэгт итгэлтэй байгаагаа илэрхийлэв.