"Токио-2020" олимпын хүрэл медальт, дэлхийн аварга, Ази тивийн аварга, Монгол Улсын гавьяат тамирчин Ц.Цогтбаатарын энэ өдөр мэндэлжээ. “Сүлд” спорт хороо, “Наран мандал” компанийн тамирчин Цэнд-Очирын Цогтбаатар Баянхонгор аймгийн Хүрээмарал суманд 1996 оны гуравдугаар сарын 16-ны өдөр төржээ.

      Ц.Цогтбаатар жүдо бөхийн өсвөр үеийн дэлхийн аваргын хүрэл медальтай, залуучуудын ДАШТ-д хошой мөнгөн медальтай. Өсвөр үе, залуучууд, насанд хүрэгчдийн гэсэн гурван ангиллын ДАШТ-ээс медаль хүртсэн. "Ташкент-2022" ДАШТ-д түрүүлж, дэлхийн аварга болсон.

      Тэрбээр дэлхийн аваргын алтан медалийн төлөөх барилдаанд ДАШТ-ий алт, мөнгө, хүрэл медальт Японы алдарт Соичи Хашимотог нэмэлт цагт ялж дэлхийн аваргын алтан медалийг хүртэж байлаа. Ц.Цогтбаатар Монголын жүдочдоос  төрсөн тав дахь дэлхийн аварга юм. Түүнээс өмнө Х.Цагаанбаатар “Роттердам-2009”, М.Уранцэцэг “Рио Де Жанейро-2013”, Г.Болдбаатар “Челябинск-2014”, Д.Сумъяа “Будапешт-2017” алтан медалийн эзэн болж байсан. Харин түүний дараа Б.Баасанхүү “Абу Даби-2024” ДАШТ-ээс алтан медаль хүртэж дэлхийн аварга болсон билээ.