Ази тивийн хамгийн том лигүүдийн аварга багуудын нэгтгэсэн Зүүн Азийн “Супер лиг”-т МСБХ-ны Үндэсний дээд лигийн 2025 оны аварга баг оролцохоор болсон. Азийн сагсан бөмбөгийн чуулга уулзалтад МСБХ-ны төлөөлөгчид урилгаар оролцсон байна.

       Энэ үеэр Зүүн Азийн лигийн зөвлөх зөвлөлийн хурал болж, Монгол Улсыг төлөөлж МСБХ-ны ерөнхий нарийн бичгийн дарга С.Төгсжаргалыг гишүүнээр сонгожээ. Ингэснээр олон улсын лигийн тэмцээний зөвлөлд Монгол Улсаас төлөөлөгч ажиллаж буй анхны тохиолдол болж байна.

       Манай дээд лигийн 2025 оны аварга баг Зүүн Азийн супер лигийн 2025-2026 оны улиралд Өмнөд Солонгосын лигийн аварга баг, Филиппиний “PBA” лигийн дэд аварга, Японы “B” лигийн “Хирошима Драгонфлайрс” багтай нэг хэсэгт орох юм.

      Энэ хүрээнд дээрх шилдэг багууд Монголд тоглох бөгөөд манай сагсан бөмбөг сонирхогчид Азийн топ багуудын тоглолтыг эх орондоо үзэх боломжтой болж байна. Түүнчлэн Японы лигийн төлөөлөгчид Монголоос тоглогч авах сонирхолтой байгаагаа илэрхийлснээр хоёр тал хамтран ажиллахаар болжээ.