Чөлөөт бөхийн дэлхийн аварга, Монгол Улсын гавьяат тамирчин, Сүхээгийн Цэрэнчимэд 1995 оны энэ өдөр Хэнтий аймгийн Цэнхэрмандал суманд мэндэлжээ. Тэрбээр БХЯ-ны зэвсэгт хүчний "Алдар" спорт хорооны МУГТ Ц.Цогтбаяр, МУГД Ц.Хосбаяр нарын удирдлага дор 2006 оноос эхлэн чөлөөт бөхөөр хичээллэсэн. 

        Гавьяат тамирчин С.Цэрэнчимэд Узбекистаны Ташкент хотод болсон 2014 оны чөлөөт бөхийн насанд хүрэгчдийн  дэлхийн аварга шалгаруулах тэмцээний 59 кг-ын жинд 19 настайдаа түрүүлж, дэлхийн аварга цол хүртсэн. Харин 2015 онд АНУ-ын  Лас Вегас хотод болсон дэлхийн аварга шалгаруулах тэмцээнээс мөнгөн медаль, дэлхийн залуучуудын аварга шалгаруулах тэмцээнээс алтан медаль хүртсэн юм.

     Тэрбээр 2024 онд Албани Улсын Тирана хотод болсон насанд хүрэгчдийн олимпын бус жингийн ДАШТ-ийн  59 кг-ын жинд мөнгөн медаль авсан. Урьдчилсан шатанд Мексикийн Алехандра Ривера Арригаг 10:0-ийн харьцаагаар ялсан. Шигшээ 16-д Канадын Лоренс Бьюрегардтай 8:8-ын харьцаагаар тэнцэн, бүхэл онооны илүүгээр ялсан. Улмаар шөвгийн наймд Азербайжаны Алёна Колесникийг 9:0-ээр, хагас шигшээд Энэтхэгийн Манси Мансиг 4:1-ийн харьцаагаар тус тус ялж финалд шалгарсан. Харин финалд шүүгчдийн буруу шүүлтийн улмаас Японы  Рисока Кавайд 4:2-ын харьцаагаар хожигдож, арван жилийн дараа ДАШТ-ээс дахин мөнгөн медаль хүртсэн билээ.

     Мөн С.Цэрэнчимэд цэрэг, армийн дэлхийн аварга шалгаруулах тэмцээний алтан медаль, Иван Яригыны “Алтан гран при” тэмцээний алтан медальтай. 2025 оны улсын аварга шалгаруулах тэмцээний 62 кг-ын жинд дэлхийн аварга, МУГТ П.Орхоныг ялж алтан медаль хүртсэн.  Үүнээс гадна МУГТ С.Цэрэнчимэд “Монголиа опен” олон улсын тэмцээний гурван удаагийн аварга, ДАШТ-ий нэг алт, хоёр мөнгөн медальтай. Монгол Улсын насанд хүрэгчдийн УАШТ-ий таван удаагийн аварга. Монгол Улсын гавьяат тамирчин билээ.