Харбины Азийн өвлийн наадмын бэлгэдэл сахиус "Бинбин", "Нини" нь Зүүн хойдын буюу Сибирийн бараас сэдэвлэсэн хүүхэлдэйн дүрс юм. "Бинбин", "Нини" хоёрын анхны загварууд нь 2023 оны 9-р сард Хармөрөн мужийн Сибирийн барын цэцэрлэгт хүрээлэнд төрсөн хоёр бяцхан бар болно.

     Сибирийн бар бол дэлхийн хэмжээнд ховордсон, Хятадын үндэсний нэгдүгээр зэрэглэлийн дархан цаазат амьтдын нэг юм. Амьдрах орчин сүйтгэгдэх, хууль бус агнуур хийх зэргийн нөлөөгөөр Сибирийн барын тоо огцом буурч, 20-р зууны сүүлчээр Хятадад ердөө 10 гаруй зэрлэг Сибирийн бар үлдсэн юм.

     Хожим нь байгалийн дархан цаазат газар байгуулах, ан агнуурыг хориглох бодлогыг хэрэгжүүлэх, сурталчлах ажлыг эрчимжүүлэх зэрэг олон арга хэмжээ авсны улмаар Сибирийн барын тоо толгой нэмэгдсэн байна. 2024 оны эцэс гэхэд Хятадын Сибирийн бар, ирвэсний үндэсний цэцэрлэгт хүрээлэнд 70 орчим зэрлэг Сибирийн бар тогтвортой амьдрах болжээ.