Хятадын  Харбин хотод Азийн өвлийн спортын наадамд 34 орны 1275 тамирчин 11 спортын 64 төрөлд оролцож байгаа бол манай улсаас дөрвөн спортын долоон төрөлд 28 дасгалжуулагчийн удирдлага дор 35 тамирчин өрсөлдөж байна. Одоогийн байдлаар наадам зохион байгуулагч Хятадын баг найман алт, найман мөнгө, таван хүрэл медальтайгаар тэргүүлж явна.

     Харин Өмнөд Солонгосын баг долоон алт, таван мөнгө, долоон хүрэл медаль, Япон Улс хоёр алт, нэг мөнгө, дөрвөн хүрэл медальтайгаар эхний гурван байрт бичигдлээ. Медаль хүртсэн ердөө таван орон байгаа бөгөөд медалийн тавцанд гараагүй 29 улсын тоонд Монгол Улс багтаж байна. Монголын баг тамирчид “Саппоро-1990” Азийн өвлийн спортын наадмаас эрэгтэйчүүдийн гүйлтийн цанын буухиа төрлөөр анхны хүрэл медалийг хүртэж байсан. 

    Мөн “Чанчүн-2007” наадамд уулын цанын чөлөөт гулгалтаар хүрэл медаль, “Астана, Алматы-2011” наадмаас бөмбөгтэй хоккейн баг мөнгө, цанын зүг чиг олох уралдаан (ski orienteering)-ы төрлөөр дөрвөн хүрэл медаль хүртсэн. Монголын баг тамирчид Азийн өвлийн спортын наадмаас нэг мөнгө, зургаан хүрэл буюу нийт долоон медаль хүртэж байв.