Хятадын Харбин хотод Азийн өвлийн спортын наадам гурав дахь өдрөө үргэлжилж байна. Өчигдөр гүйлтийн цанын 1.5 км-ын зайн уралдаанд Монголын найман тамирчин өрсөлдсөнөөс зургаа нь хагас шигшээд шалгарсан юм. Өнөөдөр манай улсын гүйлтийн цаначид таван км-ын зайд уралдах билээ.

        Хагас шигшээд шалгарсан Монголын хоёр эмэгтэй цаначныг онцолбол, Э.Ариунтунгалаг нь Азийн өвлийн спортын наадамд анх удаа уралдаж байгаа бөгөөд тэрбээр Швейцар Улсад болсон тэмцээнд 13 дугаар, Алс дорнодын аварга шалгаруулах цуврал тэмцээний сонгомол техникийн таван км-ын зайд тавдугаар байрт орсон нь ирээдүйтэй тамирчин болохыг илтгэнэ. Харин Т.Ариунболд нь биатлоны спортоор анхлан хичээллэж байсан ба төрсөн эгчийнхээ дуудлагаар цанын спорт руу орсон байна.