Монголын хөл бөмбөгийн холбооны ерөнхийлөгч М.Болд ажлаа хүлээлгэн өгч буйгаа зарлалаа. Сүүлийн үед хөл бөмбөгийн холбоог тойрсон санхүүжилттэй холбоотой асуудал олны анхаарлыг татсан. Улмаар хөл бөмбөг сонирхогчид, зүтгэлтнүүд, клубүүд ээлж дараалан шаардлага хүргүүлж, эсэргүүцлээ илэрхийлж, ээлжит бус их хурлаа хийхийг шаардаж байв.

    Үүсээд буй асуудал дээр ажлын хэсэг гарган ажиллаж байгаа. Одоогоор үр дүнд хүрээгүй байна. Харин энэ үед холбооны ерөнхийлөгч нь ажлаа өгч байгаагаа зарлав.  Тэрбээр “Хөл бөмбөгийн жинхэнэ хөгжлийн төлөө оролцогч талууд эцэс төгсгөлгүй хардлага гүтгэлгийг орхиж, эв нэгдлийг эрхэмлэн хамтдаа хөгжинө хэмээн итгэж байна" хэмээн хэлжээ.

    Өнгөрсөн сард хөл бөмбөгийн холбооны ерөнхий нарийн бичгийн дарга Т.Дагвадорж үүрэгт ажлаа өгч, түүний оронд М.Ганбаатар томилогдсон билээ.