Монголын үндэсний олимпын академи, Засгийн газрын хэрэгжүүлэгч агентлаг Биеийн тамир, спортын улсын хороо болон бусад байгууллагууд хамтран “ “Боловсрол, бие бялдрын хүмүүжил, олимпизм” сэдэвт зорилтот аяныг зохион байгуулж байна. Тус аян нь 2025 оны хоёрдугаар сарын 1-нээс, дөрөвдүгээр сарын 10- ны хооронд зохион байгуулагдана. Одоогийн байдлаар есөн ЕБС- ийг сонгон арга хэмжээг эхлээд байна.

      Үүнд  Архангай аймгийн ерөнхий боловсролын төрөлжсөн сургалттай спортын 5 дугаар сургууль, Хөвсгөл аймгийн ерөнхий боловсролын “ Ирээдүй - 21 дүгээр зуун” сургууль, Баянгол дүүргийн ерөнхий боловсролын “Эрдмийн-Ундраа” сургууль, Баянзүрх дүүргийн ерөнхий боловсролын 69 дүгээр сургууль, Сүхбаатар дүүргийн ерөнхий боловсролын “Эрдмийн хөтөч” сургууль, Сүхбаатар дүүргийн ерөнхий боловсролын 35 дугаар сургууль, Сонгинохайрхан дүүргийн ерөнхий боловсролын 67 дугаар сургууль, Налайх дүүргийн ерөнхий боловсролын 109 дүгээр сургууль, Хан- Уул дүүргийн ерөнхий боловсролын 52 дугаар сургууль тус тус орж байна.

      Аянд оролцож буй сургуулиудын захиралуудтай Монголын үндэсний олимпын академийн зүгээс хамтран ажиллах гэрээ байгуулан ажиллаж байна. Доорх үндсэн ажил, арга хэмжээг дээрх сургуулиуд зохион байгуулах ба хамтран ажиллах юм. Олон улсын олимпын хорооны “Олимпын үнэт зүйлийн боловсролын Хөтөлбөр”- ийг анх удаа Монгол Улсад хэрэгжүүлэх үйл ажиллагааг зохион байгуулах.

      Олимпын боловсрол ба бие бялдрын хүмүүжлийн ажлыг үр дүнтэйгээр зохион явуулах шинэлэг арга, туршлагыг нэвтрүүлнэ. Казахстан, Узбекистан, ОХУ- ын Буриад, Монгол хүүхдийн бие бялдрын хөгжилт ба ерөнхий бэлтгэлжилтийн түвшин, бие бялдрын хүмүүжлийн ажлыг харьцуулан судлах олон улсын үйл ажиллагаанд оролцоно.

      Сурагчдын дунд зохион байгуулах “Соёл- бие бялдрын хүмүүжил- олимпын боловсрол “ сэдэвт олимпиадад оролцоно. “Хүүхдийн спорт: Өнөө ба ирээдүй” сэдэвт олон улсын Форумд илтгэл хэлэлцүүлэх ба  ОХУ-ын Эрхүү мужийн Усолье- Сибирск, Ангарск, Шелехов, Эрхүү хотуудын ЕБС- иудад туршлага судлах арга хэмжээнд хамрагдана. Өнөөдөр зорилтот аянд оролцогч ЕБС- иудын биеийн тамирын багш нарын хамтарсан зөвлөлдөх хурлыг зохион байгууллаа.