Тайландын засмал замын дугуйн улсын аварга шалгаруулах тэмцээнд ОУХМ Б.Тэгшбаяр хүрэл медаль хүртлээ. Дугуйн үндэсний шигшээ багийн тамирчин ОУХМ Б.Тэгшбаяр нь Тайландын мэргэжлийн “Roojai insurance” багтай 2025 оны гэрээгээ үргэлжлүүлэн сунгасан.

    Түүний хувьд өмнөх онд “Tour of Bostonliq UCI2.2” тэмцээний нийлбэр дүнгээр тэргүүлж аваргын шар цамцны эзэн, мөн “Tour of Qinghai Lake UCI2.Pro” тэмцээний 7-р гараанд хоёрдугаар байр эзэлж гайхалтай амжилтыг үзүүлсэн юм. Түүний хувьд энэ оны тэмцээнээ амжилттай эхлүүллээ.

     Учир нь 2025 оны нэгдүгээр сарын 17-ноос 19-ний хооронд болж өнгөрсөн Тайландын эзэн хаан Пумибол Адульядетийн нэрэмжит засмал замын дугуйн улсын аварга шалгаруулах нээлттэй тэмцээний ганцаарчилсан цуваа гараатай 31.8 км-ийн уралдаанд 47’47”-ийн амжилтаар хүрэл медаль хүртсэн юм.

     Түүнчлэн манай тамирчин Тайланд Улсад удахгүй болох Ази тивийн аварга шалгаруулах тэмцээнд Монгол Улсаа төлөөлөн холимог багийн төрөл болон бөөн гараанд уралдана.