Энэ өдөр олимпын хүрэл, ДАШТ-ий хошой хүрэл медальт, Азийн аварга, Казахстан Улсын гавьяат тамирчин Галбадрахын Отгонцэцэг мэндэлжээ. Тэрбээр Казахстан Улсын нэрийн өмнөөс тив, дэлхий, олимпын тэмцээнд оролцож, “Эсгий туургатны эв нэгдлийн бэлгэдэл” болон олимп, дэлхийн медальтан болж, монгол жүдочийн ур чадвар, авьяасыг дэлхийд харуулсан билээ.

          Харин өнөөдөр Рио-2016” олимпын хүрэл медальт, ДАШТ-ий хошой хүрэл медальт, жүдоч Г.Отгонцэцэг эх орондоо эргэн ирж нийслэл хотноо жүдо бөхийн “Winner” клубийг байгуулж, үйл ажиллагаагаа эхлүүлээд байгаа. Тэрбээр, Монгол Улсын иргэншлээ сэргээж, жүдо бөхийн спортоор сурч, мэдсэн зүйлсээ болон арга туршлагаа монголынхоо хүүхэд залууст зааж сургах мөрөөдлөө биелүүлэхээр зорьж байгаа юм.

         Галбадрахын Отгонцэцэг 2015 онд иргэншлээ солин, дасгалжуулагч Д.Энхбаатарын хамт Казахстаныг зорин, тус улсын нэрийн өмнөөс барилдаж “Рио-2016” олимпын дэвжээнээс хүрэл медаль хүртсэн. Улмаар 2017, 2018 оны ДАШТ-ээс хүрэл медаль хүртэж, дэлхийн хошой медальтан болсон шилдэг эмэгтэй жүдочин билээ.

          Мөн Ази тивийн аварга шалгаруулах тэмцээнээс 2016 онд алт, 2017 онд мөнгө, 2019 онд хүрэл, 2018 онд Азийн XVIII наадмаас хүрэл медаль хүртэж Казахстаны эмэгтэй жүдо бөхийн хөгжил, амжилтыг дараагийн шатанд гаргасан гавьяатан мөн.