Өвлийн олимпын 25 дахь удаагийн наадам Италийн Милан, Кортина д‘Ампеццо хотуудад 2026 оны хоёрдугаар сарын 6-22-ны өдрүүдэд зохион байгуулагдах билээ. Тус олимпын наадамд дэлхийн шилдэг 3500 гаруй тамирчин, 16 спортын төрлөөр 116 багц медалийн төлөө өрсөлдөх юм. Италийн Альпийн үзэсгэлэнт бүс нутагт 20 жилийн дараа өвлийн олимп эргэн ирж байна. “Милано Кортина - 2026” өвлийн олимпын наадмын тасалбар захиалгын бүртгэл  эхэллээ.

        https://tickets.milanocortina2026.org/ вебсайт дээр 2025 оны нэгдүгээр сарын 15-ны өдөр эхэлсэн бөгөөд 2025 оны хоёрдугаар сарын 6-ны өдөр албан ёсоор зарагдаж эхэлж байна. “Милано Кортина – 2026” нь түүхэн дэх хүйсийн тэнцвэрийг хамгийн ихээр хадгалсан өвлийн олимпын наадам байх бөгөөд оролцогч тамирчдын 47 хувийг эмэгтэйчүүд эзэлж байгаа. Түүнчлэн эмэгтэйчүүдийн хосын льюж чарга, холимог багийн скелетон чарганы төрлүүд нэмэгджээ.

     Өвлийн паралимпын наадмын тухайд 2026 оны гуравдугаар сарын 6-15-ны хооронд зохион байгуулагдах бөгөөд 600 гаруй тамирчин спортын зургаан төрөлд 79 багц медалийн төлөө өрсөлдөх болно. Энэ үеэр өвлийн паралимпын наадмын 50 жилийн ой давхцаж байгаагаараа онцлогтой.