Монгол Улсын гавьяат тамирчин Дугарсүрэнгийн Оюунболд агсны нэрэмжит 2025 оны чөлөөт бөхийн насанд хүрэгчдийн УАШТ “Монгол бөхийн өргөө”-нд хоёр дахь өдрөө үргэлжилж байна. Өнөөдөр дэвжээнээ эрэгтэйчүүдийн 74, 79, 86 кг, эмэгтэйчүүдийн 50, 55, 57, 68 кг-ын жингийн барилдаанууд явагдаж медалийн төлөө барилдах тамирчид шалгарлаа. Урьдчилсан шатны болон хагас шигшээ, дагах барилдаанууд 11:00 цагаас явагдсан. Медалийн төлөөх болон чансаа тогтоох барилдаанууд 18:00 цагаас явагдах хуваарьтай байна.

      Эмэгтэйчүүдийн 50 кг-ын жинд М.Мөнхгэрэл, Б.Мөнхнар, 57 кг-д Х.Болортуяа, Б.Энхтүвшин, 68 кг-д Э.Дэлгэрмаа, Ганцэцэг нар хоорондоо алтан медалийн төлөө барилдана. Харин эмэгтэйчүүдийн 55 кг-ын жин тойргоор барилдаж аваргаа тодруулах юм. Энэ жинд Б.Отгонтуяа, Б.Дөлгөөн нар финалдах боломжтой байгаа. Эрэгтэйчүүдийн 74 кг-ын жинд Б.Батбаяр, Э.Төгсжаргал, 79 кг-д О.Сүлдхүү, Ж.Далайцэрэн, 86 кг-д Э.Бямбадорж, Н.Батбилгүүн нар хоорондоо алтан медалийнн төлөө өрсөлдөнө.