Чөлөөт бөхийн 2025 оны насанд хүрэгчдийн УАШТ-ий эхний өдөр эрэгтэйчүүдийн дөрөв, эмэгтэйчүүдийн гурван жингийн барилдаанууд явагдаж медалийн эзэд тодрох билээ.  Эрэгтэйчүүдийн хамгийн хөнгөн жин болох 57 кг-ын жинд “Төгс” дэвжээний бөх “U23” хүртэлх насныхны ДАШТ-ий хүрэл медальт Б.Мөнх-Эрдэнэ, Монголын чөлөөт бөхийн холбооны тамирчин “U23”  хүртэлх насныхны Монгол Улсын аварга С.Жигүүр нар финалдлаа.

      Тэгвэл 61 кг-ын жинд “Хилчин” спорт хорооны тамирчин ДАШТ-ий хүрэл медальт, Азийн аваргын мөнгөн медальт ОУХМ З.Занабазар, “Баянгол-Аваргууд” академийн бөх ДАШТ-ий хүрэл, Азийн аваргын хошой хүрэл медальт ОУХМ Т.Түвшинтулга нар аваргын төлөө барилдана. Эрэгтэйчүүдийн 65 кг-д бүх өрсөлдөгчөө цэвэр ялсан “Алдар” спорт хорооны бөх ДАШТ-ий хүрэл медальт Ц.Цогбадрах, “Баянгол- Аваргууд” академийн тамирчин, дэлхийн оюутан, залуусын универсиад наадмын хүрэл медальт Д.Төрбаяр нар тунаж үлдлээ.

     Харин 70 кг-д “Хүч” спорт хорооны харьяат гавьяат тамирчин, ДАШТ-ий хүрэл медальт, “Парис-2024” олимпын наадмын V байрын шагналт, МУГТ Т.Тулга үдээс өмнөх бүх барилдаанууддаа цэвэр ялж финалдсан. Түүнтэй Монголын чөлөөт бөхийн холбооны бөх Б.Өсөхбаяр өнөөдөр таамаг эвдэж шигшээ барилдаанд зодоглохоор шалгарав.

      Эмэгтэйчүүдийн 53 кг-ын жинд "Алдар" спорт хорооны бөх “U23” хүртэлх насныхны ДАШТ-ий хүрэл, Азийн аваргын мөнгө, хүрэл медальтай Ч.Отгонтуяа, "Дархан Хасу FOHOW" клубийн бөх, Азийн аваргын мөнгөн медальт, ОУХМ Ц.Намуунцэцэг нар аваргын төлөө барилдана. Эдгээр бөхчүүд хэсгийн шатнаа учраа таарахад Ч.Отгонтуяа 9:8-ын харьцаатайгаар ялсан юм.

      Харин эмэгтэйчүүдийн 62 кг-ын жинд дэлхийн аварга, МУГТ  П.Орхон, Дэлхийн аварга, МУГТ С.Цэрэнчимэд нар ганц ч оноо алдалгүй бүх өрсөлдөгчөө цэвэр ялснаар финалдлаа. Эмэгтэйчүүдийн 76 кг-ын жинд хүч сорьж буй бөхчүүд тойргоор барилдаж, аваргаа тодруулах юм.