Холбоодын нэгдсэн улсын аваргын тэргэнцэртэй сэлэмний дөрөв дэх удаагийн 2025 оны УАШТ Буянт Ухаа спортын ордонд амжилттай болж өндөрлөлөө.  "Лос Анжелес-2028" паралимпын наадмыг зорьж буй шилдэг сэлэмчдийн тулаанд Д.Цолмон, Б.Даваасүрэн нар дөрөв дэх удаагаа аваргалж, өөрийн төрөлдөө дархан аваргууд гэдгээ нотлон харуулсан. Мөн хамгийн сүүлд явагдсан багийн тэмцээнд Б.Даваасүрэн, Д.Билэг, Б.Батжаргал, Д.Ганбаатар нарын бүрэлдэхүүнтэй “Team-1” аваргалав. Б.Даваасүрэнгийн хувьд өнөө жилийн УАШТ-ээс хоёр дахь алтан медалиа ийн хүртсэн юм.

      Эрэгтэй ганцаарчилсан төрөлд Б.Даваасүрэн дөрөв дэх түрүүгээ авч, тэргэнцэртэй сэлэмний дархан аварга болов. Түүний хувьд тэргэнцэнщртэй сэлэмний УАШТ зохиогдож эхэлснээс хойш ялагдал амсаагүй явна.

УАШТ-ий хоёр хүрэл медальт Н.Булган анх удаа финалд үлдэж, мөнгөн медаль хүртэв. Түүнчлэн А.Дөлгөөн улсын аваргын гурав дахь хүрэл медалиа авлаа.  Эмэгтэйчүүдийн ганцаарчилсан төрөлд мөн л дархан аварга тодорсон. Тэргэнцэртэй сэлэмчдээс Азийн аваргын анхны хүрэл медалийг хүртсэн Д.Цолмон мөн л улсын аваргын дөрөв дэх алтан медалиа өөрийн болгосон юм. Түүний хувьд Б.Даваасүрэнгийн нэгэн адил УАШТ-ий талбарт ялагдал амсаагүй явна.

      Түүнтэй финалд өрсөлдсөн М.Булганчимэгийн хувьд УАШТ-ий анхны медалиа авсан. Түүнчлэн улсын аваргаас хоёр мөнгө, нэг хүрэл медаль аваад байсан С.Оюундарь хоёр дахь хүрэл медалиа хүртлээ. Дархан-Уул аймгаас ирж оролцсон 59 настай тамирчин Ж.Цэцэгсайхан УАШТ-ий анхны хүрэл медалиа авсныг онцлох нь зүйтэй.

Эрэгтэй ганцаарчилсан төрөл:

1.Б.Даваасүрэн

2.Н.Булган

3.А.Дөлгөөн

3.Б.Жигмэддорж

Эмэгтэй ганцаарчилсан төрөл:

1.Д.Цолмон

2.М.Булганчимэг

3.С.Оюундарь

3.Ж.Цэцэгсайхан

Эрэгтэй багийн тэмцээний дүн:

1. “Team-1” (Б.Даваасүрэн, Д.Билэг, Б.Батжаргал, Д.Ганбаатар)

2. “Team-3” (Б.Жигмэддорж, С.Бямбасүрэн, У.Даваадорж, Т.Хашбаатар)

3. “Team-2” (Н.Булган, Г.Бямба, С.Ган-Эрдэнэ, Т.Ганзориг)