МОНГОЛЫН ХОККЕЙН СПОРТЫН ТӨЛӨӨ СЭТГЭЛ ЗҮРХЭЭ ЗОРИУЛАГЧ А.МЭРГЭН БАГШ

2024-12-30, 856

Монголын хоккейн спортын хөгжил яах аргагүй түүнтэй холбоотой. Мөсөн талбайд гарахдаа тэр хурд, хүч, төвлөрөлийн голд өөрийгөө бүрэн зогсоож, цаг, минудтай уралдан тэмцэж, өөртэйгээ гулгаж, өөрийгөө ялж, ялагдаж сурсан тамирчин. Зөвхөн өөртэйгээ шүү. Цаашлаад энэ төрөлд өрсөлдөгч тамирчдыг бэлтгэж, уяа сунгааг нь тааруулж, урам зоригоор тэтгэж, баг тамирчдад энэ төрлийн шинэ техник зааж, тэдний сэтгэлзүйч болж яваа. Энэ бол шинэ оны босгон дээр Гавьяат дасгалжуулагч цол хүртээд буй А.Мэргэн багш.

Түүний дасгажуулсан баг 2017 онд бөмбөгтэй хоккейн Дэлхийн аварга шалгаруулах тэмцээнээс хүрэл медаль хүртсэн нь биднээс хөгжил алс хоккейн спортын түүхэнд том амжилт болж байсныг спорт сонирхогчид андахгүй. Тус тэмцээнд Монголын хоккейчид нийт зургаан тоглолт хийж А хэсэгт Япон, Унгар, Украины хоккейчидтой өрсөлдөж Монголын шигшээ багийнхан ганц ч хожигдолгүйгээр хэсгээ тэргүүлж, Украиныг 9:6, Японыг 10:2, Унгарыг 9:5-аар хожсон нь тэмдэглэгдэн үлдсэн. Үүний дараа Голландын шигшээгийнхнийг 6:2-оор хожиж хагас шигшээд шалгаран Канадын багтай эн тэнцүү тоглож 6:5-аар хожигдон хүрэл медалийн эзэд болсон байдаг.

Энэ амжилтыг гаргахын тулд 2006 оноос эхэлж бөмбөгтэй хоккейн Дэлхийн аварга шалгаруулах тэмцээнд оролцсон гэдэг. Үндсэндээ 16 жил шантрахгүйгээр тасралтгүй оролцож байж энэ амжилтыг эзэмшсэн. А.Мэргэн дасгалжуулагч хоккей гэж тэсвэр тэвчээр соригч спортын том төрөлд сэтгэл зүрхээ зориулагч тамирчдынхаа цуцашгүй хөдөлмөрийг ирлэгч, итгэлийг нь хурцлагч. Энэ спортын төлөө өөрийгөө зориулан амьдарч яваа түүнийг аав нь анх мөсөн талбайд хөтөлсөн байна. Тэндээс л гулган тэмүүлэх их мөрөөдлөө олж, Монголын хоккейн спортын хөгжлийн гэрлийг асаахаар зориг шулуудаж, өнөөдрийг хүртэл зүтгэсээр байгаа нь энэ юм. Тэрбээр "Би алдарт Михиаловын хүү Егор, Чебатуркин хоёрын туслахаар хоёр жил бэлтгэл хийсэн. ЦСКА багийг сагсан бөмбөгтэй харьцуулбал алдартай багуудын адил юм. Түүнчлэн хоккейн хамгийн өндөр амжилт гаргасан багуудын нэг, домогт хоккейчдыг бэлтгэдэг газар. Тус багт хоёр жил бэлтгэгдээд их зүйл сурч, арвин туршлага хуримтлуулж чадсан. Би АНУ-д дээд боловсрол эзэмшихдээ цагтай уралдаж, ЦСКА-д ажиллахдаа цагийн үнэ цэнийг ойлгож чадсан юм. Эхний үед их ачаалал авч, ядран, шантрах үе олон байсан. Гэхдээ тийм мундаг дасгалжуулагч, тамирчдын бэлтгэл, сургуулилалт, зорилго, тэмүүллээс их урам авч байгаа гэдгээ ухамсарлаж илүү хичээж чадсанаар амархан давсан" гэжээ. Энэ түүний амжилтын гол суурь үе аж.

Эндээс сайн тамирчин, дасгалжуулагч болон өндийж,"Mergen Hockey academy”-ийг байгуулж, өсвөрийн хоккейчдыг бэлдэх үйлсийг эхлүүлжээ. Хоккейн спортыг эх орондоо хөгжүүлж, тэр хөгжил хэзээ ч хоцрохгүй, бүдгэрэхгүй байхын үндэс нь мэдээж залуу үе. Үнэхээр ч спортод хайртай, эрүүл чийрэг монгол хүнийг бэлтгэхийн тулд багаас нь эхлэх хэрэгтэй гэх түүний баримтлал яах аргагүй энэ төрөлд сэтгэлээ уяж, тэр уяа хэзээ ч тасрахгүйгээр бөхлөгдсөн гэдгийг илтгэнэ. Хүмүүс юу сэтгэл зүрхийг нь татаж байна, түүндээ хамаг бүхнээ зориулан амьдардаг гэдгийн нэг том жишээ бол А.Мэргэн дасгалжуулагч. Монголд хоккейн спортыг хөгжүүлэхээр төрсөн түүнд Гавьяат цол хүртсэнд баяр хүргэе. Үргэлж хурд, хүч, тэсвэр тэвчээр, ухаан, сэтгэлийнхээ дунд зогсож, мөсөн талбай руу хөтлөн гаргасан олон залуусдаа зүг чиг нь болж, өндөр амжилтаар дүүрэн байх болтугай.

МОНГОЛЫН ХОККЕЙН СПОРТЫН ТӨЛӨӨ СЭТГЭЛ ЗҮРХЭЭ ЗОРИУЛАГЧ А.МЭРГЭН БАГШ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.