Нийслэлийн Хан-Уул дүүргийн 90 настай ахмад настан, Монгол Улсын гавьяат тамирчин Ц.Раднаа гуай “Бөртэ чоно-2024”  спортын хүндэтгэлийн ёслолын наадмын “Олимпын шилдэг зүтгэлтэн” шагналыг хүртэв. Тэрбээр 2024 онд Швед Улсын Гётенбург хотод болсон 25 дахь удаагийн хөнгөн атлетикийн мастеруудын ДАШТ-ий 90-95 насны ангилалд 100 болон 800 метрийн зайд түрүүлж, хос алтан медаль хүртсэн билээ.  

      Түүний хувьд 85 настайдаа буюу 2019 онд  Польш Улсад болсон хөнгөн атлетикийн дэлхийн аварга шалгаруулах тэмцээнд гурван алтан медаль хүртэж, нэг дээд амжилт тогтоосон анхны монгол хүн юм. Ц.Раднаа гуай монгол хүний тэсвэр  хатуужил, авьяас чадварыг харуулж,  залууст үлгэр дуурайлал болж, биширмээр амжилтыг удаа дараалан үзүүлж, тамирчин хүн тэсвэр тэвчээртэй байж, тогтмол бэлтгэлээ хийж чадвал зорилгодоо хүрдгийг харуулж яваа. Тэрбээр 95 насандаа мастеруудын дэлхийн аварга, тивийн аварга шалгаруулах тэмцээн, 2028 онд болох 100 хүртэлх насны ахмадуудын олимпод өрсөлдөх зорилго тавиад байгаа билээ.