Бахрайн Улсын Манама хотод хүндийн өргөлтийн насанд хүрэгчдийн дэлхийн аварга шалгаруулах тэмцээн энэ сарын 6-15-ны өдрүүдэд болсон. Тус ДАШТ-д дэлхийн 92 орны 471 тамирчид өрсөлдсөн. Тус ДАШТ-ий эмэгтэйчүүдийн 81 кг-ын жинд гавьяат тамирчин, “Алтан охин”  М.Анхцэцэг огцом өргөлтөөр 116 кг-ыг өргөж мөнгөн медаль хүртэж, насанд хүрэгчдийн ДАШТ-ий тав дахь медалиа гардан авсан билээ.

       Монгол Улсын гавьяат тамирчин, дэлхийн аварга, Ази тивийн аварга М.Анхцэцэг  2017 оны ДАШТ-ээс огцом өргөлтөөр хүрэл медаль, 2019 оны ДАШТ –ээс огцом өргөлтөөр хүрэл медаль, 2021 оны ДАШТ-ээс огцом, түлхэлттэй өргөлтийн нийлбэр дүнгээр алтан медаль хүртэж, дэлхийн аварга болж байлаа. Харин 2022 оны ДАШТ–ээс түлхэлттэй өргөлтөөр мөнгөн медаль, 2024 оны ДАШТ-ээс огцом өргөлтөөр мөнгөн медаль хүртсэн амжилтийг тус тус үзүүлсэн. “Токио-2020” олимпын наадмын шагналт дөрөвдүгээр байрт шалгарч байв. “Парис-2024” олимпын наадамд бэртэл нь бүрэн илааршаагүй байхад оролцож амжилт үзүүлж чадаагүй. МУГТ М.Анхцэцэг “Монгол HD” телевизийн "Өнөө өглөө" хөтөлбөрт оролцохдоо зодог тайлах бодолтой байгаагаа мэдэгдсэн байна.