“Женко” клубийн тамирчин Ганбаатарын Ихэрцэцэг 2004 оны энэ өдөр Сүхбаатар аймгийн Баяндэлгэр суманд мэндэлжээ. Тэрбээр бүст барилдааны дэлхийн аварга шалгаруулах тэмцээний хүрэл медальтай. Үндэсний биеийн тамирын дээд сургуульд суралцдаг. Хан-Уул дүүргийн “Женко” клубийн багш, Монгол Улсын гавьяат дасгалжуулагч Шархүүгийн Цэвэлмаа, ОУХМ Саранзаяа, МҮБТДС-ийн Мөнгөнтуяа багш нарын удирдлага дор бэлтгэл, сургуулилалтаа хийдэг. Бөхийн спортоор анх долдугаар ангид байх үеэсээ хичээллэж эхэлсэн. Одоо ес дэх жилдээ жүдо бөхөөр хичээллэж байгаа. Анх аавтайгаа хөдөө гэртээ зурагтаар бөх үзэж байгаад хичээллэх сонирхол төрсөн гэдэг. Тэгээд л найзыгаа дагаад бөхийн дугуйланд явж эхэлсэн юм билээ. Харин Аав нь “Охин хүүхэд гар, хөлөө хугалчихгүй бол бөхөөр хичээллэх л хэрэгтэй” хэмээн дэмжсэн гэсэн.