Энэтхэг Улсад болсон “Ucmas International Competition-2024” олон улсын  тэмцээнээс Дархан-Уул аймгийн “Оюуны-Ирээдүй” цогцолбор сургуулийн 1-р ангийн сурагч Сүрэнжавын Гэрэлзаяа алтан медаль хүртжээ. Тус тэмцээн энэ сарын 15-ны өдөр болсон бөгөөд дэлхийн 37 орны 7500 гаруй хүүхэд оролцсон байна. 

       С.Гэрэлзаяа соробан сампингийн  долоон насны ангилалд 1-р байр эзлэн алтан медаль, аваргын цом хүртжээ. Мөн тэрбээр цээж тооны төрөлд гуравдугаар байр эзлэн хүрэл медаль хүртсэн бахдам амжилт үзүүлсэн байна. Оюун ухааны спортын бяцхан тамирчин С.Гэрэлтзаяа удахгүй 2025 оны нэгдүгээр сард АНУ болох дэлхийн аварга шалгаруулах тэмцээнд эх орноо төлөөлөн оролцох аж.