Энэ өдөр “Парис-2024” паралимпын аварга, МУГТ У.Сүрэнжавын дасгалжуулагч ОУХМ Н.Эрдэнэбаатар мэндэлжээ. Н.Эрдэнэбаатар багш 1994 онд найман настайдаа энэхүү спортод хөл тавьж байжээ. Анх Монголын таеквондогийн холбооны “Цагаан-Өд” клубээс гараагаа эхлүүлсэн байдаг. Түүний анхны багш нь Түвшинбаяр, Баярсайхан багш нар юм билээ. Н.Эрдэнэбаатар таеквондогийн “МК” клубийн нэрэмжит тэмцээнээс 1996 онд  анхны хүрэл медалиа хүртэж байв.

      1998 онд “Арслан” клубийн тамирчин болж, олон улс, тив, дэлхийн тэмцээнд оролцож эхэлсэн юм. 2002 оны Белги Улсын нээлтэй тэмцээнээс олон улсын тэмцээний анхны хүрэл медаль авч байжээ. УАШТ-ий 12 удаагийн аварга юм. 2007, 2009, 2011 оны ДАШТ, 2008, 2010 оны  Азийн аварга оролцож байсан. Харин 2009 оны Зүүн Азийн наадмаас таеквондогийн төрлөөр анхны мөнгөн медалийг авч байлаа.

     Тэрбээр 2011 он хүртэл шигшээ багийн тамирчин, 2011 оны дөрөвдүгээр сард “Олимп таеквондо” клубийг байгуулан дасгалжуулагчаар ажиллаж эхэлсэн юм. 2013 оноос хойш Таеквондогийн Үндэсний шигшээ багийн дасгалжуулагчаар ажиллаж байгаа.