Энэ өдөр “Имперо Групп”, “Сүлд” спорт хороо, Жүдо бөхийн Үндэсний шигшээ багийн, МУГТ Бавуудоржийн.Баасанхүү Хөвсгөл аймгийн Мөрөн хотод мэндэлжээ. Гавьяат тамирчин Б.Баасанхүү  2024 онд жүдо бөхийн  “Хонконг-2024” Ази тивийн аварга,  “Душанбе-2024” их дуулгын аварга,  “Абу Даби-2024” дэлхийн  аварга шалгаруулах тэмцээнээс алтан медальт хүртэж, улмаар “Парис-2024” олимпын наадмаас мөнгөн медаль хүртсэн бахдам амжилтыг нэг жилийн дотор гаргасан билээ.

Тэрбээр “Grand Slam”-аас хоёр мөнгө, нэг хүрэл, жүдо бөхийн насанд хүрэгчдийн улсын аварга шалгаруулах тэмцээнээс нэг алт, нэг мөнгө, самбо бөхийн залуучуудын дэлхийн аварга алт, хүрэл, самбо бөхийн Азийн аваргаас хоёр алт, нэг мөнгө, самбо бөхийн дэлхийн цомоос нэг алт, нэг мөнгө, хоёр хүрэл, самбо бөхийн тулааны наадмаас алтан медаль хүртэж байлаа.

          Түүнийг “IJF”-ийн мэргэжилтнүүд Хөвсгөл аймагт тусгай хөтөлбөрийн хүрээнд зочлох үедээ хөдөөгөөс шүүрдэж олсон “Хясаанд нуугдсан сувд”  хэмээж байлаа. Тэрбээр ч  “IJF”-ийн мэргэжилтнүүдийн итгэлийг алдалгүй  “Алдарт бага дэлхийн аварга” хэмээх Парисын их дуулгаас мөнгө, Тель-Авив их дуулгаас хүрэл медаль хүртсэн билээ. Мөн Туркийн Антальяд болсон их дуулга тэмцээний эмэгтэйчүүдийн хамгийн хөнгөн жин буюу 48 кг-ын жинд  Г.Наранцэцэгийн хамтаар хүрэл медалийн тавцанд зогссон юм.

 Б.Баасанхүү “Парис-2024” олимпын 48 кг-ын жингийн “C” хэсгийн нэгдүгээр тойргийн барилдаанд  Мальтийн  Е.Катринатай учраа таарч цэвэр ялсан. Хоёрдугаар  тойрогт  Австрийн Кетринаг цэвэр,  хэсгийн аваргын төлөөх барилдаанд Парагвайн  Нарваез Габриелаг ялсан. Улмаар хэсгийн аваргын төлөө Испанийн Мартинез Абелендатай барилдаж нэмэлт цагт ялсан юм. Олимпын наадмын алтан медалийн төлөөх барилдаанд дэлхийн гурван удаагийн аварга, “Ханжоу-2022” Азийн наадмын аварга,  Японы Нацүми Цунадотой   өрсөлдөж олимпын мөнгөн медаль хүртсэн билээ.