Исланд Улсад пауэрлифтинг буюу хүчний гурван төрөлт хэвтээ шахалт, суулт, таталтын насанд хүрэгчдийн дэлхийн аварга шалгаруулах тэмцээн болж байна.  Энэ удаагийн ДАШТ арваннэгдүгээр сарын 11-16-ны өдрүүдэд болж өндөрлөнө.

     Манай улсаас МПНХ-ны ерөнхийлөгч, гавьяат дасгалжуулагч Д.Баттулгын удирдлага дор эрэгтэй гурав, эмэгтэй гурван тамирчин өрсөлдөж байгаа юм. Тэмцээний эхний өдөр эрэгтэйчүүдийн 83 кг-ын жинд Монгол Улсын тамирчин Б.Дүвжид суултын төрөлд 347.5 кг-ыг өргөснөөр хүрэл медаль хүртлээ.

     Түүний ДАШТ-ий хоёр дахь хүрэл медаль энэ бөгөөд өмнө нь 2014 оны тус тэмцээнээс хүрэл медаль хүртэж байв. Мөн дэлхийн клубуудын аварга, 2014 оны Ази тивийн алтан медальтай ба Монгол Улсын 12 удаагийн аварга, дээд амжилтыг эзэмшигч тамирчин юм.