Беларусь Улсын  Минск хотноо өнөөдөр  Спортын хутга шидэлтийн ДАШТ эхэлж байна. Тус ДАШТ-ий зар сурталчилгааны баннерт Монголын тамирчин Б. Амарбаясгалангийн зураг орж, манай орны талаар эерэг сурталчилгаа явагдаж эхэллээ.  Б.Амарбаясгалан одоо 26 настай. Энэ спортоор гурван жил хичээллэж байгаа. Анх ОХУ-д их сургуульд суралцаж байх үеэсээ эхлэн хутга шидэлтийн спортыг сонирхон хичээллэж эхэлсэн түүхтэй.

    Өдгөө хоёр дахь удаагаа ДАШТ оролцож байна. Тэрбээр 2023 онд ОХУ-ын Уфа хотноо болсон олон улсын тэмцээнээс эмэгтэй ганцаарчилсан төрөлд хүрэл медаль хүртэж байсан манай улсын спортын хутга шидэлтийн шигшээ багийн шилдэг тамирчин юм.

    Б. Амарбаясгалан нь Монголын спортын хутга шидэлтийн холбооны Удирдах зөвлөлийн гишүүнээр 2024 оны аравдугаар сард сонгогдон, энэ спортоо хөгжүүлэх, сурталчилах зэргээр идэвхтэй ажиллаж байна. Энэ удаагийн ДАШТ-д  Г. Эрдэнэбилэг багийн ахлагчтай Б. Амарбаясгалан болон Т.Энхтөгөлдөр нарын тамирчид өрсөлдөнө.