Чөлөөт бөхийн “U23” насны Ази тивийн аварга шалгаруулах тэмцээний эмэгтэйчүүдийн 65 кг-ын жингийн  хүрэл медальт Батсүхийн Ганцэцэг 2001 оны энэ өдөр Дархан хотод мэндэлжээ. Тэрбээр Монголын үндэсний биеийн тамирын дээд сургуулийн гуравдугаар курсийн оюутан. Түүнийг есөн настай байхад эмээ нь Дархан хотын БТСГ-ын чөлөөт бөхийн секцэнд анх хөтлөн оруулж өгсөн гэдэг. Түүнээс хойш нэлээдгүй цаг хугацаа өнгөрч хичээллэх тусам улам бүр чөлөөт бөхийн спортод шимтэн дурлах болсон юм билээ.

    Б.Ганцэцэгт чөлөөт бөхийн “А” үсгийг Дархан хотын БТСГ-ын дасгалжуулагч, “Дархан Хасу мегастарс” клубийн багш, ОУХМ Ёндонпүрэвийн Батдархан заасан. Түүний дараа нь “Хасу мегастарс” клубийн МУГД Цэндийн Баярсайхан багш дээрээ очиж, одоог хүртэл хичээллэж байгаа. Б.Ганцэцэг залуучуудын УАШТ-д 2021, 2022, 2023 онд түрүүлж байв. Насанд хүрэгчдийн УАШТ-д 2023 онд мөнгөн медаль хүртсэн юм.